काठमाडौं– नेपाल चलचित्र तथा सांस्कृतिक प्रतिष्ठानले आयोजना गरेको सातौँ संस्करणको नेपाल अन्तर्राष्ट्रिय चलचित्र महोत्सव (निफ) बिहीबारदेखि काठमाडौंमा सुरु भएको छ । 

सिभिल मलमा आयोजना गरिएको एक कार्यक्रमबाट सञ्चारमन्त्री रेखा शर्माले महोत्सवको उद्घाटन गर्दै सफलताको शुभकामना दिइन् । 

उद्घाटन समारोहमा वरिष्ठ कलाकार मदनकृष्ण श्रेष्ठ,  निर्देशक एवं कलाकार नीर शाह, नायक भुवन केसीलगायत  विभिन्न देशका चलचित्रकर्मी उपस्थित थिए । 

ओपनिङ फिल्मका  रुपमा आनी छोइङ डोल्माको जीवनीमा आधारित डकुमेन्ट्री ‘आनी छोइङ डोल्मा : मिसन इम्पोसिबल’ प्रदर्शन गरिएको थियो ।

यस महोत्सवमा ४० देशका ८८ फिल्म देखाइने आयोजकले जनाएको छ । साथै विभिन्न अन्तरक्रिया कार्यक्रम गर्ने पनि आयोजकले जनाएको छ ।

महोत्सवलाई राष्ट्रिय र अन्तर्राष्ट्रिय गरी दुई भागमा विभाजन गरिएको छ । दुवै भागका उत्कृष्ट फिचर फिल्म, लघु फिल्म र डकुमेन्ट्री विधामा अवार्ड वितरण गरिने आयोजकले बताएको छ ।

महोत्सवमा अन्तर्राष्ट्रिय प्रतिस्पर्धा अन्तर्गत उत्कृष्ट फिचर फिल्मलाई १५ सय अमेरिकी डलर र गौतमबुद्ध अवार्ड प्रदान गरिने आयोजकले जनाएको छ । त्यस्तै उत्कृष्ट फिचर फिल्म, लघु चलचित्र र वृत्तचित्रलाई पुरस्कृत गरिने आयोजकको भनाइ छ ।