काठमाडौं – नेपाल प्रिमियर लिग (एनपीएल) अन्तर्गत शुक्रबारको पहिलो खेलमा कर्णाली याक्सले लुम्बिनी लायन्सलाई १२९ रनको चुनौती दिएको छ।

पूरै २० ओभर खेल्दै कर्णालीले ८ विकेटको क्षतिमा १२८ रन बनाएको हो। कीर्तिपुरस्थित त्रिवि क्रिकेट मैदानमा टस जितेर लुम्बिनीले सुरुमा कर्णालीलाई ब्याटिङको निम्तो दिएको थियो।

कर्णालीका लागि विलियम बोसिस्टोले सर्वाधिक ४४ रन बनाए। ३० बलको सामना गरेका उनले तीन चौका र तीन छक्का हिर्काए। २२ बलको सामना गरेका बाबर हयात एक चौका र एक छक्काको मद्दतमा २० रन बनाएर आउट भए।

देव खनाललाई तीन रनमा गुमाएको कर्णालीले गुल्सन झालाई ८ रनमै गुमाएको हो। कर्णालीका चाडविक वाल्टन १३ रनमै आउट भएको खेलमा अजुन घर्तीले २५ रन जोडे।

लुम्बिनीका लागि अन्तिम ओभरमा विकाश आग्रीले चमत्कारिक बलिङ गरे। उनले एउटै ओभरमा मात्र तीन रन दिएर तीन विकेट हात पारे। लुम्बिनीका लागि तिलक भण्डारीले दुई विकेट लिए भने रोहित पौडेल, रामोन सिमन्ड्स र साद बिन जफरले एकएक विकेट हात पारे।

प्लेअफ दौडमै रहेको कर्णालीका लागि आजको खेल जित्नैपर्ने दबाब छ भने लुम्बिनी अन्तिम खेलमा सान्त्वना जित निकाल्न चाहन्छ। एनपील तालिकामा कर्णाली ६ अंकसहित चौथो स्थानमा छ। समान अंक भएको चितवन रनरेटको आधारमा तेस्रो स्थानमा छ।

प्रतियोगितामा एक मात्र हार चाखेको जनकपुर १० अंकसहित शीर्ष स्थानमा हुँदा सुदूरपश्चिम आठ अंकसहित दोस्रो स्थानमा छ।