काठमाडौं – पाकिस्तानले जम्मु र कश्मीरका बारेमा मिथ्या सूचना फैलाइरहेको भन्दै भारतले निन्दा गरेको छ । संयुक्त राष्ट्रसंघीय बैठकमा भारतको माथिल्लो सदन राज्यसभाका सांसद राजीव शुक्लाले पाकिस्तानले जम्मु र कश्मीरका बारेमा मिथ्या र भ्रामक सूचना फैलाइरहेको आरोप लगाए ।

भारतीय समाचार संस्था एएनआईका अनुसार पाकिस्तानी पक्षले राष्ट्रसंघमा जम्मु र कश्मीरका बारेमा बारम्बार भ्रामक जानकारी दिने गरेको उनले आरोप लगाए । जम्मु कश्मीरमा हालै सम्पन्न निर्वाचन स्वतन्त्र र निष्पक्ष भएको भन्दै उनले जतिसुकै मिथ्या सूचना सम्प्रेषण गरेपनि यथार्थमा कुनै परिवर्तन नहुने टिप्पणी समेत गरे ।

जम्मु कश्मीरमा हालै तीन चरणमा सम्पन्न मतदानमा कीर्तिमानी स्तरमा मतदाताको सहभागिता रहेको सांसद शुक्लाको भनाइ छ । यसबाट भारतीय जनतामाझ लोकतान्त्रिक प्रणालीमा पूर्ण विश्वास रहेको पुष्टि भएको उनले बताए ।