काठमाडौँ– पाकिस्तानमा दुई जना सैनिक र दुई प्रहरी प्रतिआतंकवाद कारवाहीमा मारिएका छन् । गोप्य सूचनाका आधारमा सुरक्षा फौजले गरेको कारवाहीका क्रममा चार सुरक्षाकर्मी मारिएका हुन् ।

सुरक्षा फौजले ‘हाइ प्रोफाइल’ आतंकारीविरुद्ध गरेको कारवाहीका क्रममा उनीहरुको मृत्यु भएको पाकिस्तानी सेनाको अन्तरसेवा जनसम्पर्क (आईएसपीआर) ले जनाएको छ ।

कारवाहीका क्रममा ती उच्च प्रोफाइलका आतंककारी अब्दुल रहिम र उनका दुई सहयोगी पनि मारिएको सेनाले उल्लेख गरेको छ ।

पाकिस्तानबाट प्रकाशित हुने डन अखबारका अनुसार पेशावर जिल्लाको हसन खेल क्षेत्रमा गरिएको उक्त कारवाहीमा मारिनेमा सेनाका २४ वर्षीय सिपाही मोहम्मद इद्रिस, ३४ वर्षीय सिपाही बदाम गुल, प्रहरीका २८ वर्षीय सब इन्सपेक्टर तजमिर शाह र ३८ वर्षीय असिस्टेन्ट सब इन्सपेक्टर मुहम्मद अक्रम रहेका छन् ।

मृतकप्रति राष्ट्रपति आशिफ अली जर्दारीले शोक व्यक्त गरेको डनले जनाएको छ ।