नयाँ दिल्ली– पश्चिमी भारतको जयपुर सहरमा कम्तीमा चार विद्यालयमा सोमबार बमको धम्की आएको छ । धम्कीपछि विद्यालय प्रशासनले विद्यार्थीहरू बाहिर निकालेर प्रहरीलाई बोलाएको छ । 

इमेलमा प्राप्त धम्कीमा विद्यालय परिसरमा विस्फोटक पदार्थ राखिएको दाबी गरेको थियो । धम्की आएपछि प्रहरीले बम खोजी गर्न विद्यालयमा डिस्पोजल स्क्वाड र स्निफर कुकुरहरू पठाएको छ ।

तर अहिलेसम्म शंकास्पद केही पनि फेला परेको छैन । प्रहरीका अनुसार उक्त धम्की अफवाहजस्तो देखिन्थ्यो ।

जयपुरका पुलिस प्रमुख बिजु जर्ज जोसेफले चारदेखि पाँच विद्यालयमा बमको धम्की आएको जानकारी दिए। 

इमेल प्रेषकको पहिचान गर्ने प्रयास भइरहेको प्रहरीले जनाएको छ । आइतबार दिल्लीको इन्दिरा गान्धी अन्तर्राष्ट्रिय विमानस्थल र राष्ट्रिय राजधानीका धेरै अस्पतालमा इमेलहरूमा बमको धम्की प्राप्त भएको थियो । 

यसै महिनाको सुरुमा भारतको राजधानी क्षेत्र दिल्लीका एक सयभन्दा बढी विद्यालयले यस्तै सन्देशहरू प्राप्त गरेका थिए । यसबाट त्रास बढेको छ।

सन् २०२३ डिसेम्बरमा दक्षिणी भारतीय सहर बेङ्गलुरूका दर्जनौँ विद्यालयमा बमको धम्की आएको थियो । पछि ती धम्की अफवाह साबित भएका थिए ।