काठमाडौं–गत आइतबार दर्ता भएको अशोक राई नेतृत्वको जनता समाजवादी पार्टीबाट सोमबार एकजना मन्त्री र अर्का राज्यमन्त्री थपिने भएका छन् ।

राई नेतृत्वको नयाँ जसपातिर खुलेका वन तथा वातावरण मन्त्री नवलकिशोर साह सुडीलाई भने पार्टीले यथावत राख्ने भएको छ ।

जसपाले उपेन्द्र यादवले राजीनामा दिएपछि सोमबारदेखि खाली भएको स्वास्थ्य मन्त्राालयमा प्रदीप यादवलाई पठाउन सिफारिस गरेको छ ।

त्यस्तै राज्यमन्त्रीका लागि भने जसपाले दुईजनाको सिफारिस गरेको छ । जसपाबाट समानुपातिक सांसदद्वय हसिना खातुन र रञ्जु झाको नाम सिफारिस भएको छ ।

उता फागुन २१ मा एमाले र माओवादीसहितको गठबन्धन बनेपछि वन मन्त्रालयको जिम्मेवारी पाएका सुडी कायमै हुने भएका छन् ।

‘दुईजना साथीहरू थपिले सुनेको छु । यसबारे मलाई औपचारिक जानकारी आएको छैन । तर म यथावत् रहन्छु’, उनले खबरहबसँग भने ।

जसपा नेपाल विभाजित भएपछि सुडी अध्यक्ष यादवलाई छाडेर राई नेतृत्वको नयाँ जसपामा खुलेका छन् ।

मन्त्री हुन लागेका यादव पर्सा निर्वाचन क्षेत्र नम्बर १ बाट प्रतिनिधिसभा सदस्यमा विजयी भएका हुन् ।

अर्कातिर समानुपातिक सांसद मञ्जु शर्मा अन्सारीको निधन भएपछि रिक्त कोटामा बाँकेकी हसिना खानले मौका पाएकी थिइन् । उनलाई राज्यमन्त्रीका रुपमा सिफारिस गरिएको हो ।

प्रदीप यादव भने पहिला पनि मन्त्री भइसकेका हुन । उता खान संसद्‍को पहिलो यात्रामै राज्यमन्त्री हुन लागेकी हुन् ।

यसअघि १२ सांसद रहँदा पनि जसपाबाट २ मन्त्री र १ राज्यमन्त्री थिए । त्यसकारण राई नेतृत्वको जसपालाई २ मन्त्री र १ राज्यमन्त्री दिन लागिएको हो ।