काठमाडौं – दक्षिण चीन सागरमा चीन र फिलिपिन्सबीच तनाव जारी छ । हालै फिलिपिन्सले चिनियाँ नौसैनिक बलका सैनिकले आफ्ना माझीलाई दुव्र्यवहार गरेको आरोप लगाएको छ ।

फिलिपिनी तटरक्षक बलले पश्चिम फिलिपिनी सागरस्थित रोजुल रिफ क्षेत्रमा माछा मारिरहेका आफ्ना माझीलाई लक्षित गरी चिनियाँ नौसेनाले हेलिकोप्टरको प्रयोग गरी दुव्र्यवहार गरेको जनाएको हो । फिलिपिन्सले दक्षिण चीन सागरलाई पश्चिम फिलिपिनी सागरको नामले सम्बोधन गर्छ ।

घटना भएका बेला सो क्षेत्रमा २० भन्दा धेरै माछा मार्ने डुङ्गा रहेको फिलिपिनी तटरक्षा बलका प्रवक्ता कोमोडोर जे टारेइलाले बताएका छन् ।

चिनियाँ कदमको जवाफस्वरुप फिलिपिन्सले पनि दुई वटा नौसैनिक युद्धपोत तैनाथ गरेको जनाइएको छ । दक्षिण चीन सागरमा लामो समयदेखि सार्वभौमिकताका विषयमा चीन र फिलिपिन्सबीच विवाद रहँदै आएको छ ।