काठमाडौं– काठमाडौं जिल्ला अदालतले विवादित मेडिकल व्यवसायी दुर्गा प्रसाईंलाई साइबर अपराधको मुद्दामा धरौटीमा छोड्न आदेश दिएको छ ।

अदालतका न्यायाधीश विष्णुप्रसाद अवस्थीको इजलासले प्रसाईंलाई ४० हजार रुपैयाँ धरौटीमा छोड्न आदेश दिएको हो । प्रसाईंले प्रधानमन्त्री केपी शर्मा ओलीले नेपालबाट रकम लगेर कम्बोडियामा लगानी गरेको दाबी गरेका थिए ।

झुट्ठा दाबी गरेको आरोपमा प्रसाईंलाई प्रहरीले मङ्सिर ४ गते पक्राउ गरेको थियो । विद्युतीय कारोबार ऐन–२०६३ अन्तर्गतको कसुरमा प्रसाईं पक्राउ परेका थिए ।

जिल्ला अदालतले धरौटीमा छोड्न आदेश दिए पनि प्रसाईं तत्काल छुट्ने छैनन् । केन्द्रीय अनुसन्धान ब्यूरो (सीआईबी) का प्रवक्ता होविन्द्र बोगटीका अनुसार उनीमाथि आपराधिक विश्वासघातको कसुरमा अनुसन्धान चलिरहेकाले नछुट्ने भएका हुन् ।

साइबर अपराधको मुद्दामा धरौटीमा छाड्ने आदेश आए पनि आपराधिक विश्वासघातको कसुरमा उनी हिरासतमै बस्नुपर्ने बोगटीको भनाइ छ ।