काठमाडौं– नेपाल प्रिमियर लिग (एनपीएल) अन्तर्गतको बिहीबारको जनकपुर बोल्ट्सविरुद्धको खेलमा काठमाडौं गुर्खाज १०२ रनको सामान्य लक्ष्य प्रस्तुत गरेको छ ।

कीर्तिपुर मैदानमा टस जितेर जनकपुरविरुद्ध पहिलो ब्याटिङमा उत्रिएको काठमाडौंले १९ दशमवल ३ ओभरमा सबै विकेट गुमाउँदै १०१ रन बनाएको हो ।

सुरुमै लड्खडाएको काठमाडौंका ब्याटर आजको खेलमा चल्न सकेनन् । काठमाडौं लागि सर्वाधिक रन बनाउने गेर्हार्ड इरास्मसले २२ बल खर्चेर मात्रै २० रन जोडे । उनले दुई चौका प्रहार गरे ।

काठमाडौंका दुवै ओपनरको ब्याटिङ आजको खेलमा चलेन । स्टिफन एस्किनाजीले १९ बल सामना गर्दा मात्रै १७ रन जोडे । अर्का ओपनर माइलक लिभर्टले दोहोरो रन बनाउन सकेनन् । उनी ६ बलमा आठ रन जोडेर पेविलियन फर्किए ।

करण केसीले १३ बलमा २ चौका र १ छक्काको सहयोगमा १९ रन जोडे । अन्य खेलाडीले भने दोहोरो रन बनाउन सकेनन् ।

बलिङतर्फ ललित राजवंशी र शेर मल्लले समान तीन विकेट लिए । मोहम्मद मोहसिनले दुई, अरनिको यादव र किशोर महतोले समान एक विकेट लिए ।