ताप्लेजुङ- मुक्कुमलुङका नामले समेत चिनिने पाथीभरा क्षेत्र आदिवासी संस्कृति र इतिहासको धरोहर रहेको भन्दै आदिवासी कलाकारहरुले यहाँको भ्रमण गरेका छन् ।

ताप्लेजुङको फुङलिङ बजार हुँदै पाथीभरा–मुक्कुमलुङको शीरमा पुगेका उनीहरुले त्यहाँ विभिन्न कलाकृति कोर्नुका साथै केबलकार निर्माणमा क्रममा ढालिएका रुखको ठुटोलाई अंकमाल गरेर विरोध जनाए ।

मुक्कुमलुङ संरक्षण संयुक्त संघर्ष समिति र केबलकार खारेजी संयुक्त संघर्ष समितिको आयोजनामा आदिवासी कलाकारहरु ताप्लेजुङ पुगेका हुन् ।

पाथीभरामा केबलकार बनाइन नहुने, पाथीभराको नाम मुक्कुमलुङ राखिनुपर्ने र यहाँका आदिवासीहरुको हक अधिकार एवं मुन्धुमी संस्कृतिको संरक्षण गरिनुपर्ने मागसहित आदिवासी अभियन्ताहरुले संघर्ष समिति नै बनाएर आन्दोलन गर्दै आइरहेका छन् ।

आन्दोलनमा ऐक्यवद्धता जनाउन काठमाडौंबाट १६ जना कलाकारसहित अभियन्ताहरुको टोली भदौ २२ गते पाथीभरा मुक्कुमलुङको शिखरमा पुगेको थियो ।

त्यहाँबाट फर्केर फुङलिङमा २६ गते विरोध प्रदर्शन गरिएको थियो ।

मुक्कुमलुङ संरक्षण आन्दोलनलाई ऐक्यबद्धता जनाउन मुन्धुमी मुक्कुमलुङमा आदिवासी कला प्रतिरोध यात्रा आयोजना गरिएको अभियन्ता गोविन्द छन्त्यालले खबरहबलाई बताए ।

आन्दोलनमा ऐक्यवद्धताका लागि पुगेका कलाकार (आर्टिस्ट) हरुमा सुवास तामाङ (मोरङ), सपना नेपाली (कास्की), मनरा प्रजापति (काठमाडौं), सारा कोइँच सुनुवार (धनुषा), दीक्षा राई (खोटाङ), सोनाम चाम्लिङ राई (खोटाङ), कला लिम्बू (मोरङ), गंगा लिम्बू (ताप्लेजुङ), नाम्साङ किरण लिम्बू (इलाम), पुजन लिम्बू (सुनसरी), मेख लिम्बू (धनकुटा) र विनोद लिम्बू (झापा) रहेका छन् ।

त्यसैगरी टोलीमा कैलाश राई (भोजपुर), निरन्ती तुम्बापो (पाँचथर), गोबिन्द छन्त्याल (बागलुङ), डा. सविन निङ्लेखु लिम्बू (तेह्रथुम), र सेन्दो सेलिङ लिम्बू (इलाम) लगायतका अनुसन्धानकर्मी, नागरिक अभियन्ता तथा आदिवासी अधिकारकर्मीहरू पनि सहभागी थिए ।

थप तस्बिर