काठमाडौं– सत्तारुढ नेपाली कांग्रेसले जारी केन्द्रीय कार्यसमिति बैठक तत्कालका लागि स्थगित गरेको छ । कांग्रेसले साउन २३ गतेबाट सुरु भएको बैठक भदौ ६ गतेसम्मका लागि स्थगित गरेको हो । 

केन्द्रीय कार्यसमितिको अर्को बैठक भदौ ७ गते बिहान ११ बजे बस्ने गरी स्थगित गरिएको कांग्रेस केन्द्रीय कार्यालयका मुख्यसचिव कृष्णप्रसाद पौडेलले जानकारी दिए । 

उनले सोमबारको बैठकमा पनि ११ वटा विभिन्न प्रस्तावित विषयहरूमाथि धारणा राख्ने क्रम जारी रहेको बताए । सोमबारको बैठकमा २१ जना केन्द्रीय सदस्यहरूले आ–आफ्नो धारणा राखेका छन् । 

हालसम्म ९४ जना केन्द्रीय सदस्यहरू र सातवटै प्रदेशका सभापतिहरुले धारणा राखिसकेका छन् । कांग्रेसले पार्टीका प्रदेश सभापतिहरुलाई आमन्त्रित सदस्यका रुपमा केन्द्रीय कार्यसमिति बैठकमा सहभागी गराउँदै आएको छ । 

बैठकको पहिलो दिन केन्द्रीय सदस्य तथा गृहमन्त्री रमेश लेखकले राष्ट्रिय सहमतिको सरकार गठनका सम्बन्धमा भएको सहमति कार्यसमितिलाई जानकारी गराएका थिए । 

यस्तै केन्द्रीय सदस्य तथा परराष्ट्रमन्त्री डा। आरजु राणा देउवाले बंगलादेश, बेलायत, इजरायल, लेवनानमा पछिल्लो समय विकसित घटनाक्रमका बारेमा पार्टीलाई ‘ब्रिफ’ गरेकी थिइन् ।