काठमाडौं– नेकपा एकीकृत समाजवादीका सांसद मेटमणि चौधरीले प्रधानमन्त्री पुष्पकमल दाहाल ‘प्रचण्ड’लाई परिस्थिति जस्तो भए पनि नेपाली कांग्रेसका सभापति शेरबहादुर देउवालाई दोषी नदेख्न सुझाएका छन् ।

प्रधानमन्त्रीले विश्वासको मत लिने प्रयोजनका लागि शुक्रबार बोलाइएको प्रतिनिधिसभाको बैठकमा उनले प्रचण्डलाई कांग्रेस सभापति देउवासँगको सम्बन्ध  सन्तुलनमा राखिरहन सुझाएका हुन् ।

‘परिस्थिति जस्तो भए पनि कांग्रेस सभापतिलाई तपाईं कत्ति पनि दोषी नदेख्नुहोला,’ सांसद चौधरीले भने, ‘उहाँसँगको सम्बन्धलाई सन्तुलनमा राख्नुहोला ।’

उनले आजका मितिदेखि चार महिनामै राजनीतिक परिस्थिति प्रचण्डको अनुकूलमा आइपुग्ने पनि जिकिर गरे ।

‘चार महिनामै परिस्थिति अनुकूल भइ त हाल्छ । हन्ड्रेड पर्सेन्ट,’ चौधरीले भने, ‘केबल चार महिना आजको दिन, आजको मितिदेखि गनेरै बसौँ । चार महिनामा परिस्थिति तपाईंकै अनुकूल र पक्षमा हुन्छ ।’

एकीकृत समाजवादीका सांसद चौधरीले यसो भनिरहँदा संसद्‍मा रहेका कांग्रेस सभापति देउवा मुसुमुसु हाँसिरहेका थिए। उता कांग्रेस उपसभापति पूर्णबहादुर खड्का हाँसोको फोहरा नै छुटाइरहेका थिए ।