चितवन– नारायणगढ–मुग्लिन सडकखण्डको सिमलतालमा शुक्रबार बिहान ३ बजे पहिरोले बगाएका दुई बसमा काउन्टरबाट टिकट काटेका यात्रुको सूची आएको छ ।

काठमाडौं–वीरगञ्ज चल्ने बसमा २४ जना र काठमाडौं–गौरको बसमा ४१ जना यात्रु सवार रहेको जानकारी आएको चितवनका प्रमुख जिल्ला अधिकारी इन्द्रदेव यादवले दिएका थिए ।

ती दुवै बसमध्ये एन्जल डिलक्समा सुरुमा २१ जना यात्रुले काउन्टरबाट टिकट काटेको सूची भेटिएको छ ।

वीरगञ्जबाट काठमाडौं आइरहेको बसमा चालक जवाही महतो र सहचालक रामकुमार लामिछाने केसी रहेको चलानबाट देखिएको छ ।

वीरगञ्जबाट काठमाडौंतर्फ जाँदै गरेको बागमती प्रदेशको १५१६ नम्बरको एन्जल डिलक्स यात्रु बसका लागि काउन्टरबाट २१ जनाले टिकट काटेको भेटिएको हो ।

उता काठमाडौंबाट रौतहटको गौरतर्फ जाँदै गरेको गणपति डिलक्स लेखेको बसमा पनि २८ जनाले टिकट काटेको भेटिएको छ।

दुवै बसका अन्य यात्रु कहाँबाट थपिए भन्ने खुलेको छैन ।

दुवै बसमा सवार ६५ जनाको अवस्था अज्ञात छ । बसलाइ पहिराेले बगाउँदै गर्दा तीन यात्रु हामफालेर बाँच्न सफल भएकाे प्रहरीले जनाएकाे छ ।

चालक जवाहिर महतोले हाँकेको बस वीरगञ्जबाट बिहीबार साँझ ८ बजे काठमाडौंका लागि छुटेको थियो । बसमा चालक र सहचालकसहित २४ जना सवार थिए ।

त्रिशूली नदीमा बेपत्ता भएका दुई बसको खोजी कार्यका लागि सशस्त्र प्रहरी बलका ७ गोताखोरसहित ७० जनाकाे टोली खटिएकाे छ ।

सशस्त्रको विपद् व्यवस्थापन तालिम शिक्षालय कुरिनटारबाट गोताखोरसहितको टोली खटिएको छ । नेपाली सेनाले पनि गोताखोर परिचालन गरेको छ । उता नेपाल प्रहरी पनि उद्धारमा जुटेको छ ।

दुवै बस शुक्रबार बिहान ३ बजे भरतपुर नगरपालिका–२९ सिमलतालमा खसेको पहिरोमा परेर त्रिशुलीमा खसेर बेपत्ता भएका हुन्।