काठमाडौँ– पाकिस्तानको पञ्जाब प्रान्तमा इसाई एवम् अन्य अल्पसङ्ख्यकमाथि ज्यादतीका घटना बढ्दै गएको पाइएको छ । सुन्नी अतिवादीहरूले पञ्जाबमा अल्पसङ्ख्यकलाई लक्षित गरी आक्रमण गर्दै आएका हुन् ।

हालैमात्र पञ्जाब प्रान्तको सरगोदा जिल्लामा अतिवादीको भीडले इसाई परिवार बस्ने घरमा प्रवेश गरी आक्रमण गर्दा एक जनाको ज्यान गएको छ । उत्तेजित भिडले आक्रमण गर्दा छेउमै प्रहरी मूकदर्शक बनेर उभिएको अफगान डायस्पोराले उल्लेख गरेको छ ।

पाकिस्तानको मानव अधिकार आयोगले इसाई परिवारको रक्षा गर्न सरकारलाई बारम्बार आग्रह गर्दै आएको छ । पाकिस्तानका अधिकारवादी अधिवक्ता जिब्रान नासिरले पछिल्लो घटनालाई सन् २०२३ को अगस्ट महिनामा जरानवालाई आक्रमणको पुनरावृत्ति भएको जनाएका छन् । 

उक्त घटनामा तहरिक ए लब्बियाक (टीएली) का कार्यकर्ताले इसाई परिवारका घर र गिर्जाघरमा आगो लगाइदिएका थिए ।

पछिल्लो घटनामा इसाई परिवारले ईश्वरको निन्दा गरेको आरोप भन्दै आक्रमण भएको बताइएको छ । उक्त इसाई परिवारले ईश्वरको निन्दा गरेको भन्दै स्थानीय मौलवीले आरोप लगाएपछि आक्रोशित भिडले आक्रमण गरेको हो ।

अल्पसङ्ख्यकको रक्षा गर्न नसकेको भन्दै पाकिस्तान सरकारमाथि बारम्बार आरोप लाग्दै आएको छ । त्यसबाहेक पाकिस्तानमा अल्पसङ्ख्यक समुदायमा सरकारप्रति चरम अविश्वास समेत रहँदै आएको बताइन्छ ।