सुर्खेत- कर्णाली प्रदेश अस्पताल सुर्खेतमा उपचारका क्रममा एक महिलाको मृत्यु भएको विषयमा विवाद उत्पन्न भएको छ ।

हिँडेर आफैँ अस्पताल पुगेकी दैलेख आठबिस नगरपालिका–५, पिपलकोटकी २२ वर्षीया भीमा गुरुङको उपचारका क्रममा बिहीबार मृत्यु भएको हो ।

भीमा पेट दुखेको भन्दै उपचारका लागि सुर्खेत पुगेकी थिइन् । उनी सामान्य चेकजाँचका लागि वीरेन्द्रनगरको एक निजी अस्पतालमा पुगेकी थिइन् । त्यहाँ उनको  पाठेघरमा केही समस्या देखियो ।

त्यसपछि आफैं हिँडेर उनी प्रदेशकै उत्कृष्ट मानिएको प्रदेश अस्पताल गइन् ।  बिहीबार बिहानै उनी अस्पताल भर्ना भइन् । अस्पतालमा चेकजाँच गराउँदा ४ महिनाअघि प्रसूति गराउँदा पाठेघरमा केही सालनाल रहेको कुरा चिकित्सकले जानकारी दिए । अप्रेसन गरेर पाठेघर सफा गर्दैगर्दा केही समयपछि नै अस्पतालले उनलाई मृत घोषणा गरिदिएको परिवारका सदस्यले बताएका छन् ।

अस्पतालले दिउँसो तीन बजेतिर मृत घोषणा गरेको थियो। परिवारलाई भेट्नै नदिई एक्कासि रगत अभाव भयो भन्दै रगत मगाएको र केही समयमै मृत घोषणा गरिए आफन्तको भनाइ छ । डाक्टरहरूको लापरबाहीका कारण उनको मृत्यु भएको भन्दै आफन्तहरूले आन्दोलन गरिरहेका छन् । शुक्रबार बिहान १० बजेदेखि चरणबद्ध आन्दोलनको कार्यक्रम अगाडि बढाइने तयारी आफन्तहरूले गरेका छन् ।

प्रदेश अस्पतालका सूचना अधिकारी विनोद बस्नेतले उक्त घटनाबारे अनुसन्धान भइरहेको बताएका छन्  ।