काठमाडौं–  सुपरहिट फिल्म ‘जात्रा’को तेस्रो शृंखला  ‘महाजात्रा’ चैत ९ गतेबाट प्रदर्शनमा आउँदै छ । फिल्ममा फडिन्द्रको श्रीमती सम्पदा ‘सम्पु’को भूमिकामा देखिएकी अभिनेत्री वर्षा राउत चलचित्रको प्रचारमा व्यस्त छिन् ।

यसअघिका दुई श्रृंखला दर्शकबाट अत्याधिक रुचाइएको फिल्म सावित भएका थिए । जात्राको तीनै श्रृंखलामा वर्षाले निरन्तरता पाएकी छन् । 

 ‘महाजात्रा’मा फडिन्द्र-सम्पदाको परिवार विस्तार भएको टेलरले नै प्रष्ट पारेको छ । यस श्रृंखलामा परिवारको आकार बढेर आर्थिक अभावसँग जुध्ने सङ्घर्षशील गृहिणीको भूमिका निर्वाह गरेको वर्षा बताउँछिन् । 

फिल्ममा आफ्नो भूमिकाबारे उनी भन्छिन्, ‘परिवारमा छोरी थपिएसँगै सम्पदा अहिले अरुको घरमा गएर काम गर्ने, आम्दानी बढाउन मेहनत गर्ने गृहणी बनेकी छ ।’

‘आर्ट’ फिल्ममा काम गर्ने रुचि भएकाले श्रृंखलामा गृहिणीकै भूमिकामा देखिन तयार भएको उनी बताउँछिन्  ।

उनी थप्छिन्, ‘म हिरोइन मै सीमित नभइ कलाकार बन्ने सोच बोकेर आएको हुँदा पनि मलाई आफूले निर्वाह गरेको भूमिका गर्न हुन्न की भन्ने नै लागेन ।’

यद्यपि आफूलाई हरेक फिल्ममा फरक शैलीमै प्रस्तुत गर्न केन्द्रित रहने उनी बताउँछिन् ।