धादिङ- धादिङको गजुरी गाउँपालिकामा जनयुद्ध दिवसमा फागुन १ गते बिदा हुने कि नहुने भन्नेमा अन्यौल भएको छ ।

गाउँपालिका अध्यक्ष गणेशलाल श्रेष्ठले जनयुद्ध दिवसमा सार्वजनिक बिदा दिने निर्णय भएको भन्दै सूचना निकालेका छन् । उता उपाध्यक्ष उपाध्यक्ष शर्मिला बिसुरालले भने फागुन १ गते बिदा दिनेबारे कुनै निर्णय नभएको जनाएकी छिन् ।

अध्यक्ष श्रेष्ठले सोमबार जारी गरेको विज्ञप्तिाम गाउँपालिकाको निर्णयअनुसार पालिका अन्तर्गतका सबै सरकारी कार्यालय, विद्यालय तथा संघ संस्थाहरुमा बिदा दिइने उल्लेख गरिएको छ ।

उता, उपाध्यक्ष बिसुरालले भने अर्को विज्ञप्ति निकालेर फागुन १ गते बिदा दिनेबारे गाउँपालिका बैठकमा कुनै छलफल वा निर्णय नै नभएको बताएकी छिन् ।

त्यस्तै, गृह मन्त्रालयले पनि सूचना निकालेर बिदा नहुने स्पष्ट पारिसकेको र सर्वोच्च अदालतले पनि जनयुद्ध दिवसमा बिदा नहुने फैसला गरेकाले पालिकामा कुनै बिदा नभएको स्पष्ट पारेकी छिन् ।