काठमाडौँ– काठमाडौँ जिल्ला अदालतका न्यायाधीश यज्ञप्रसाद आचार्यको सरुवा भएको छ ।

बाँसबारी छालाजुत्ता कारखानाको जग्गा प्रकरणमा पक्राउ परेका व्यवसायी अरुण चौधरीलाई दुई दिनमा अनुसन्धान नसके रिहा गर्न आदेश दिएपछि न्यायाधीश आचार्य विवादित बनेका थिए ।

प्रधानन्यायाधीश विश्वम्भरप्रसाद श्रेष्ठले आचार्यलाई हिजो नै मुगु जिल्ला अदालतमा काज सरुवा गरेका हुन् ।

आचार्यले आदेशमा हजारौँलाई रोजगारी दिएको र अभिभावक रहेको भन्ने शब्द समेत प्रयोग गरेका थिए ।

दुई दिनमा अनुसन्धान नसके स्वतः रिहा हुने भन्ने न्यायाधीश आचार्यको आदेशलाई उपप्रधानमन्त्री तथा गृहमन्त्री नारायणकाजी श्रेष्ठले समेत न्यायिक इतिहासकै पहिलो अनौठो आदेश भन्दै प्रतिक्रिया दिएका थिए ।

न्यायाधीश आचार्य न्याय सेवामा धेरै लामो अनुभव सँगालेका न्यायाधीश होइनन् । पर्वत जिल्लामा ०३८ सालमा जन्मेका उनी शाखा अधिकृतका रुपमा ०६७ सालमा न्याय सेवामा प्रवेश गरेका हुन् ।

आचार्य ०७३ सालमा उपसचिव बने । ०७७ सालमा खुल्ला प्रतिस्पर्धाबाट उनी न्यायाधीश नियुक्त भए ।

काठमाडौं जिल्ला अदालतमा आउनुअघिसम्म उनी जाजरकोटमा जिल्ला न्यायाधीश थिए । न्यायाधीशका रुमिा उनको अनुभव करिब ३ वर्ष मात्र रहेको छ ।