काठमाडौं– नेपाल प्रिमियर लिग अन्तर्गत बुधबारको दोस्रो खेलमा लुम्बिनीका लायन्ससामु काठमाडौं गुर्खाजका बलर दीपेश कँडेल घातकसावित भएका छन् ।

१०४ रनको लक्ष्य पछ्याएको लुम्बिनी लायन्सका दुई ओपनर आशुतोष घिरिया, अर्जुन साउद र कप्तान रोहित पौडेललाई दीपेशले सस्तैमा पवेलियन फर्काए ।

कँडेलले विकेट लिएका यी तीनै ब्याटरले दोहोरो रन जोड्न सकेनन् । पहिलो विकेटका रुपमा मैदानबाट बाहिरिएका आशुतोष १२ बल खर्चेर ४ रनमा आउट भए ।

दोस्रो विकेटका रुपमा आउट भएका अर्जुन पनि १० बल खर्चेर ३ रनको अवस्थामा दीपेशकै बलको शिकार भए ।

दीपकले आशुतोष र अर्जुनलाई एकै ओभरमा आउट गरे । ३ ओभरको दोस्रो बलमा आशुतोष र ३ ओभरको अन्तिम बलमा अर्जुन आउट भएका हुन् ।

कप्तान रोहित पनि दीपेशकै बलमा एलबीडब्लु धरापमा परेर १५ बलमा ८ रन बनाएको अवस्थामा आउट हुन पुगे ।

त्रिवि क्रिकेट मैदानमा काठमाडौं र लुम्बिनीबीचको खेल जारी छ । टस हारेर लुम्बिनी जावाफि ब्याटिङमा उत्रिएको हो ।

तस्बिर : चिरायु शाक्य