काठमाडौं- इस्लामिक देशका नेताहरू साउदी अरबमा भेला हुन थालेका छन । अरब र मुस्लिम देशका नेताहरू सोमबार साउदी अरबको राजधानी रियाद पुगिरहेका छन्।

अरब र मुस्लिम देशका नेताहरू रियादमा हुने एक सम्मेलनमा भाग लिन पुगेका हुन् । यो सम्मेलनमा गाजा र लेबनानमा इजरायलले गरिरहेको आक्रमणमा केन्द्रित छ ।

साउदी अरबको सरकारी सञ्चारमाध्यम वफाका अनुसार प्यालेस्टाइन र लेबनानमा बढ्दो हिंसालाई लिएर यो सम्मेलनले साझा धारणा बनाउँदैछ ।

‘फ्यालेस्टाइन र लेबनानी क्षेत्रमा बढ्दो हिंसा, जसमा क्रुर इजरायली आक्रमणले अरब र इस्लामी नेताहरूलाई तत्काल कुनै न कुनै कारबाही चाल्नुपर्ने दिशातर्फ बाध्य बनाउँदैछ’, सरकारी सञ्चारमाध्यम वफाले भनेको छ ।

यस सम्मेलनको मुख्य प्राथमिकता, प्यालेस्टाइन र लेबनानी क्षेत्रमा इजरायली आक्रमण रोक्ने, आममानिसको जीवन रक्षा र त्यस क्षेत्रमा शान्ति कायम गर्दै स्थिरता फर्काउने कामका लागि अन्तरराष्ट्रिय समुदायमाथि दबाब बढाउनु रहेको छ।

रियादमा भइरहेको यस सम्मेलनमा सहभागी हुन पाकिस्तानका प्रधानमन्त्री शहबाज शरिफ पनि साउदी अरब पुगिसकेका छन् ।

उनले एक्समा लेखेका छन्, ‘रियाद पुगेको छु । जहाँ म गाजामा बिग्रिरहेको स्थितिबारे आयोजित संयुक्त अरब इस्लामिक शिखर सम्मेलनमा मुस्लिम समुदायका नेतासँगै सहभागी हुनेछु । त्यहाँ म प्यालेस्टाइनका बासिन्दाको अधिकारका लागि आवाज उठाउनेछु ।’

पाकिस्तानका उपप्रधानमन्त्री तथा विदेश मन्त्री मोहम्मद इसहाक डारले पनि यस सम्मेलनमा भाग लिँदैछन् ।