काठमाडौं– नेकपा माओवादी केन्द्रले आगामी मंसिर १६ गते हुने स्थानीय तह उपनिर्वाचनमा सफलता हासिल गर्न योजनावद्ध कार्यक्रम बनाउने निर्णय गरेको छ ।

पार्टी अध्यक्ष पुष्पकमल दाहाल ‘प्रचण्ड’को निवास खुमलटारमा आज बिहान बसेको बैठकले पार्टीका उम्मेदवारलाई जिताउन एकतावद्ध भएर अगाडि बढ्न निर्देशन दिएको हो।

यस्तै, बैठकले उपनिर्वाचनमा सत्तामा रहेका कुनै पनि पार्टीसँग सहकार्य नगर्ने निर्णय गरेको पार्टी प्रवक्ता अग्निप्रसाद सापकोटाले जानकारी दिए । उनले विपक्षमा रहेका दलहरुसँग भने छलफल गर्न सकिने बताए ।

बैठकले उपनिर्वाचनका लागि प्रदेश, जिल्ला तहबाट आएका सिफारिस अनुमोदन गरेको प्रवक्ता सापकोटाले बताए। 

माओवादीले आगामी मंसिरमा पालिका सम्मेलन र खबरदारी कार्यक्रम गर्ने निर्णय गरेको छ ।

उनले आगामी पुस २ गते पार्टीको केन्द्रीय समितिको बैठक बस्ने निर्णय भएको समेत जानकारी दिए ।