काठमाडौं– राष्ट्रिय स्वतन्त्र पार्टी (रास्वपा) का सांसद मनिष झाले १९ महिना अघि सभामुख इन्दिरा रानामगरले अमेरिकी दूतावासलाई लेखेको पत्रलाई अहिले ‘बार्गेनिङ प्वाइन्टस’को रुपमा उपयोग गरिएको आरोप लगाएका छन् ।

प्रतिनिधिसभाको बुधबार बसिरहेको बैठकमा उनले उपसभामुख रानामगरलाई सत्ता पक्षले पदबाट हटाउन तयारी गरिरहेका बेला यस्तो आरोप लगाएका हुन् ।

‘लगभग १९ महिला पहिले हाम्रो उपसभामुज्यूले एउटा पत्र लेख्नुभयो । उहाँलाई पूर्ण ज्ञान नभएर हस्ताक्षर गर्नुभयो । जसबारे उहाँले मबाट गल्ती भयो भनेर विज्ञप्ति पनि निकालिसक्नुभयो,’ झाले भने, ‘१९ महिनापछि त्यो एउटा राजनीतिक रुपमा चर्चाको विषय हुँदैछ । ‘बार्गेनिङ प्वाइन्टस’का रुपमा त्यो ‘लेटर’ प्रयोग गरिदैँछ ।’

सांसद झाले नेपाली कांग्रेसको बुधबार बिहान बसेको पदाधिकारी बैठकले रानामगरबारे निकालेको निष्कर्षबारे पनि आपत्ति जनाए ।

‘आज भर्खरै कांग्रेसको केही अभिव्यक्ति आयो, नेपालको शिर झुकाउने काम भयो भनेर,’ उनले भने, ‘नेपालको शिर त्यो बेला किन झुकेन ? जुनबेला जीवित नेपाली नै विदेशी शरणार्थी भनेर पठाइयो । त्यो बेलामा शिर झुकेन ? नेपालको शिर त्यो बेला किन झुकेन जब एउटा मन्त्रीले सरकारी जग्गा हडपिएर तिनुपर्ने ट्याक्स तिर्न आनाकानी गरिरहेको छ ।’