काठमाडौं- दक्षिण अमेरिकी विश्वकप छनौट अन्तर्गत ब्राजिल पराग्वेसँग पराजित भएको छ । बुधबार बिहान सम्पन्न खेलमा पराग्वेले ब्राजिललाई १-० गोलअन्तरले पराजित गरेको हो ।

पराग्वेको जितमा खेलको २०औं मिनेटमा डिएगो गोमेजले गरेको गोल नै खेलको निर्णायक गोल बन्यो । सन् २००८ यता पहिलो पटक पराग्वेले ब्राजिललाई हराउन सफल भएको हो ।

विश्वकप छनौटमा पराग्वेको यो दोस्रो जित हो । यस जितपछि ८ खेलमा ९ अंकसहित पराग्वे सातौँ स्थानमा छ ।

त्यस्तै जारी विश्वकप छनौटमा ब्राजिलको यो चौथो हार हो । ब्राजिलले ८ खेलमा ३ जित हासिल गरेको छ भने एक खेल बराबरी खेलेको छ ।

यस खेलपछि ब्राजिलको ८ खेलमा १० अंक रहेको छ र अंक तालिकामा पाँचौँ स्थानमा छ ।

यसअघि बुधबार बिहान नै भएको खेलमा कोलम्बियासँग विश्वविजेता अर्जेन्टिना २-१ गोलअन्तरले पराजित भएको छ ।

हारपछि पनि अर्जेन्टिना दक्षिण अमेरिकी समूहको अंक तालिकामा पहिलो नम्बरमै छ । उता कोलम्बिया पनि दोस्रो नम्बरमा यथावत छ ।