काठमाडौं– साउन २५ गतेदेखि सुरु भएको माओवादी स्थायी कमिटी बैठकमा नेताहरूले सुझाव दिने क्रम जारी छ ।

आइतबार भएको स्थायी कमिटी बैठकमा पनि बोल्ने क्रममा अधिकांश नेताले पार्टी रूपान्तरण भएर जानुपर्ने एजेन्डामा पूर्ण रूपमा सहमति जनाएका छन् ।

पूर्व माओवादीहरूले नै माओवादी पार्टी राम्रो भन्न छोडेकाले नेताहरूले पार्टी सचिएर रूपान्तरण भएर जानुको विकल्प नभएको अधिकांश नेताहरूले धारणा राखेको बैठकमा सहभागी एक स्थायी कमिटी सदस्यले खबरहबरलाई जानकारी दिए ।

सो बैठकमा उनले ‘पार्टी निर्माणका समस्या, समाधानका उपाय र आगामी कार्यभार’ शीर्षकमा पार्टी उपमहासचिव जनार्दन शर्माले १४ पृष्ठ लामो प्रस्ताव पेस गरेका थिए ।

सो प्रस्तावका केही अंशहरूमा अधिकांश स्थायी कमिटी सदस्यहरूले सहमति जनाएका छन् । तर प्रचण्डले पार्टी नेतृत्व छाडेर अभिभावक बन्नुपर्ने र तेस्रो पुस्तालाई पार्टी हस्तान्तरण गर्नुपर्ने विषयमा भने धेरै नेताहरूले विमति जनाएको बैठकमा सहभागी अर्का स्थायी समिति सदस्यको भनाइ ।

सदस्यले खबरहरूलाई भने, ‘जनार्दन कमरेडले राखेका कतिपय कुराहरूमा हाम्रो सहमति छ तर अहिले नै पार्टी तेस्रो तहका नेतामा पुस्तान्तरण हुने कुरामा भने गम्भीर छलफल र विमर्श गर्नुपर्ने आवश्यक छ।’

बैठकमा जनार्दनसहित पार्टी सचिव राम कार्कीले पनि पार्टी रूपान्तरण पुस्तान्तरण र परिमार्जन सहितको नयाँ विचार आउनुपर्नेमा जोड दिएका छन् ।