काठमाडौं– पाकिस्तानको बलोचिस्तान प्रान्तमा विद्यार्थीहरुले आफ्नो क्षेत्रमा शिक्षाको स्तर खस्केको भन्दै चिन्ता व्यक्त गरेका छन् ।

बलोच विद्यार्थी कार्यसमिति (बीएसएसी) ले विज्ञप्ति जारी गर्दै बलोचिस्तान क्षेत्रमा शैक्षिक पूर्वाधारको अवस्था कमजोर रहेको भन्दै चिन्ता व्यक्त गरेको हो ।

विज्ञप्तिमा बीएसएसीले पछिल्लो समय बलोचिस्तानमा शैक्षिक अवस्था अत्यन्त कमजोर रहेको जनाएको छ ।

भारतीय समाचार संस्था एएनआईका अनुसार उक्त संगठनले सो क्षेत्रमा साक्षरता दर केबल २६ देखि ३० प्रतिशत रहेको र महिला साक्षरताको स्तर झनै खराब रहेको उल्लेख गरेको छ ।

संगठनले गराएको सर्वेक्षणमा प्रान्तका ८० प्रतिशत विद्यालयहरु कामै नलाग्ने पाइएको पनि विज्ञप्तिमा उल्लेख गरिएको छ । त्यसबाहेक बलोचिस्तान प्रान्तमा उच्च शिक्षाको अवस्था पनि निकै खराब रहेको जनाइएको छ ।

त्यसबाहेक सरकारले बलोचिस्तान प्रान्तमा शिक्षाका लागि आवश्यक स्रोत पनि विनियोजन नगरेको बीएसएसीले आरोप लगाएको छ ।

सर्वव्यापी शिक्षा आधारभूत मानव अधिकार रहेको भन्दै बीएसएसीले सबै जनतालाई समान शैक्षिक अवसर प्रदान गर्न पनि सरकारलाई आग्रह गरेको छ ।