नयाँ दिल्ली – भारतको दिल्लीमा लोकसभा चुनाव आगामी २५ मे मा हुनेछ। दिल्लीमा इन्डिया गठबन्धन र भारतीय जनता पार्टी (बिजेपी) बिच प्रतिस्पर्धा हुनेछ।

इन्डिया गठबन्धन (इन्डिया एलाइन्स)को तर्फबाट आम आदमी पार्टीले चार सिट र कांग्रेसले तीन सिटमा आफ्नो उम्मेद्वार अगाडि सारेका छन्।

सन् २०१९ मा भारतीय जनता पार्टीले सबै सात सिट आफ्नो पक्षमा पारेको थियो। तर पहिलेको तुलनामा यो चुनावमा निकै रोमान्चक प्रतिस्पर्धा हुने देखिएको छ।

सबै सिटमा मुस्लिम मतदाताको भोटले महत्त्वपूर्ण भूमिका खेल्ने अपेक्षा गरिएको छ। दिल्लीको सबै सिटमा मुस्लिम मतदाता गेम चेन्जरको रुपमा रहने राजनीतिक जानकार बताउँछन्।

मुस्लिम समुदायको भोट पाउने उम्मेद्वारले जित्ने पक्का जस्तै भएको जानकारको भनाइ छ। यो चुनावको लागि सबै तयारी अन्तिम चरणमा पुगेको दिल्लीका मुख्य निर्वाचन अधिकारी कृष्ण मूर्तिले बताए।

मतदानको लागि केन्द्र र दिल्ली सरकारले एक लाखभन्दा धेरै अधिकारी र कर्मचारी खटाएका छन्। ६ हजार ८३३ मतदान केन्द्रमा वेव कास्टको माध्यमबाट निगरानी गरिनेछ।

सात सिटको लागि दुई सय ६५ जना उम्मेद्वार चुनावी मैदानमा छन्। वृद्धवृद्धा र अशक्तको लागि विशेष व्यवस्था गरिएको मुख्य निर्वाचन अधिकारीले बताएका छन्।