नयाँदिल्ली – मनी लान्ड्रिङ मुद्दामा तीन साताका लागि जमानत पाएका दिल्लीका मुख्यमन्त्री अरविन्द केजरीवालले अब चुनावी प्रचार गर्न पाउने भएका छन्।

सर्वोच्च अदालतबाट जमानत पाएपछि उनले चुनावको ४८ घण्टाअघिसम्म प्रचारप्रसार गर्न पाउने भएका हुन्।
उनलाई शुक्रबार त्यहाँको सर्वोच्च अदालतले जुन १ सम्म अन्तरिम जमानत दिएको हो। उनले जुन २ तारिकमा अदालतमा उपस्थित हुनुपर्नेछ।

शुक्रबार केजरिवाल पाँच शर्तमा रिहा भएका हुन् । उनलाई ५० हजार रुपियाँ जमानतमा रिहा गरिएको हो । रिहा भए पनि उनलाई मुख्यमन्त्री कार्यालय र दिल्ली सचिवालयमा जान रोक लगाइएको छ ।

उनलाई कुनै सम्झौतमा हस्ताक्षर नगर्न अदालतले भनेको छ । केजरिवालले मुद्दाको किनारा नलागेसम्म मदिरा नीतिबारे कुनै पनि टिप्पणी गर्न पाउने छैनन् । उनलाई मदिरासँग सम्बन्धित कागज हेर्नसमेत रोक लगाइएको छ ।

यसअघि केजरीवालले जुन ५ सम्मको लागि जमानत पाउन अनुरोध गरेका थिए। तर चुनावको ४८ घण्टाअघि उनलाई प्रचार प्रसारमा कुनै रोक नलगाइएको अदालतले जनाएको छ।

अब सर्वोच्चको यो निर्णय ट्रायल अदालत जानेछ। दिल्लीमा २५ मेमा लोकसभाको सबै ७ सिटको लागि मतदान हुनेछ।

न्यायमूर्ति सञ्जीव खन्नाको नेतृत्वमा रहेको इजलासले केजरीवाललाई शुक्रबार जमानत दिएको हो। उनलाई दिल्लीको मदिरा नीतिमा अनियमितता गरेको आरोपमा गत मार्च २१ मा पक्राउ गरिएको थियो।

केजरिवाल ५१ दिनपछि रिहा भएका हुन्। तिहाड जेलमा रहेका केजरीवालले जेलबाट छुटेपछि समर्थकलाई सम्बोधन गर्दै आफू तानाशाहविरुद्ध लडिरहेको बताएका छन्। उनले चुनावी प्रचारका लागि कार्यक्रम घोषणा गरिसकेका छन्।