काठमाडौं– नेपाल प्रिमियर लिग क्रिकेट प्रतियोगितामा रोहित पौडेल नेतृत्वको लुम्बिनी लायन्सले चितवन राइनोजलाई ३३ रनले पराजित गरेको छ।

यससँगै लगातार चार खेलको हारपछि लुम्बिनीले पहिलो जित निकालेर राहतको श्वास फेरेको छ । लुम्बिनी पहिलो खेलमा विराटनगरसँग, दोस्रो खेलमा पोखरा एभेन्जर्ससँग, तेस्रो खेलमा सुदूरपश्चिमसँग र चौथो खेलमा जनकपुर बोल्टससँग हार्न पुगेको थियो ।

तर चितवनविरुद्ध भने कप्तान रोहितको सर्वाधिक ८० रन मद्दतमा लुम्बिनीले दिएको १६८ रनको लक्ष्य पछ्याएको चितवन २० ओभर खेल्दै ८ विकेटको क्षतिमा १३४ रनमा समेटियो ।

त्रिभुवन विश्वविद्यालयको कीर्तिपुर खेल मैदानमा भएको पहिलो खेलमा लुम्बिनीले चितवनलाई ३३ रनले पराजित गर्दै पहिलो जित निकालेको हो ।

यसअघि तीनवटा खेल लगातार हारेर अंक तालिकाको पुच्छरमा रहेको लुम्बिनीले कप्तान कप्तान रोहितकुमार पौडेलको अलराउण्ड प्रदर्शनमा उत्कृष्ट लयसहित जित निकालेको हो ।

चितवनका लागि ल्युक बेनकेनस्टनले सर्वाधिक ३१ रन बनाए । चौथो विकेटका रुपमा ११औं ओभरको दोस्रो बलमा ल्युक बेनकेनस्टन अभिषेस गौतमले आउट गराए ।

उता, कप्तान कुशल मल्लले १७ बलमा १ चौका र १ छक्काको सहयोगमा २० रन जोडेका थिए भने रवि बोपारा १६ बलमा १२ रन बनाउँदै कप्तान रोहितको बलमा आउट भएका थिए ।

त्यसअघि हारेर ब्याटिङको निम्तो पाएको लुम्बिनीले निर्धारित २० ओभरमा ६ विकेट गुमाएर १ सय ६७ रनको लक्ष्य निर्धारण गरेको थियो ।