काठमाडौं– अमेरिकी राष्ट्रपतिको कार्यालय ह्वाइट हाउसले भारतसँग युद्ध रोक्नका लागि रुससँग आग्रह गर्ने सामथ्र्य रहेको बताएको छ ।

भारतीय प्रधानमन्त्री नरेन्द्र मोदी र रुसी राष्ट्रपति पुटिनले अँकमाल गरेको तस्बिर सार्वजनिक भएपछि युक्रेनका राष्ट्रपति भोलोदिमिर जेलेन्स्कीले निराशा व्यक्त गरेका थिए त्यसपछि ह्वाइट हाउसको यस्तो प्रतिक्रिया आएको हो ।  

ह्वाइट हाउसकी प्रेस सचिव केरिनजिन पियरेले प्रेस वार्ताका क्रममा भारतसँग रुसलाई युद्ध रोक्नका लागि आग्रह गर्न सक्ने सामथ्र्य रहेको बताएकी हुन् । 

‘लामो र घनिष्ट सम्बन्धका कारण भारतले रुसलाई क्रूर युद्ध रोक्न आग्रह गर्न सक्छ । भारत र हाम्रो एक रणनीतिक साझेदार भएका कारण हामी पूर्ण रुपमा खुला कुरा गर्छौं, जसमा भारत र रुसको सम्बन्ध पनि पर्छ । यसका बारेमा हामीले पहिले पनि कुरा गरिसकेका छौँ,’ उनले भनिन् । 

प्रेस सचिव पियरेले युद्धको सुरुवात गर्न सक्ने रुसी राष्ट्रपति भ्लादमिर पुटिनले युद्ध स्थगन पनि गर्न सक्ने पनि बताइन् ।