काठमाडौं- प्रमुख प्रतिपक्षी नेपाली कांग्रेसले सहकारी ठगी प्रकरणमा उपप्रधान तथा गृहमन्त्री रवि लामिछानेबारे संसदीय छानबिन समिति नबनेसम्म संसद्को कुनै पनि कामकारबाही अघि बढ्न नदिने घोषणा गरेको छ ।

शुक्रबार संसद् बस्नेबित्तिकै विरोधमा उत्रिएपछि कांग्रेस महामन्त्री गगनकुमार थापालाई सभामुख देवराज घिमिरेले बोल्न दिएका थिए ।

उनले संसद्‍मा बोल्दै लामिछानेबारे संसदीय छानबिन समिति नबनेसम्म बैठकमा अवरोध जारी रहने घोषणा गरे ।

‘यदि मलाई यस्तै आरोप लागेमा छानबिन समिति बनोस् भन्छु । लामिछानेलाई जोगाउन महान्यायाधिवक्ता झुक्दा झुक्दा लम्पसार परिसके । गृहमन्त्रीले गल्ती गरेका हुन् भने छानबिन गरेर सफाइ लिनुपर्छ’, थापाले भने, ‘सरकार गृहमन्त्रीमाथि कुनै पनि अभियोजन र अभियोग लागेको छैन भनिरहेको छ । प्रधानमन्त्री आफैँ छानबिन पनि भएको छैन भनिनरहनु भएको छ । तर जिल्ला प्रहरी कार्यालय रुपन्देहीले गरेको अनुसन्धानले के भनेको छ ? एक अर्ब रुपैयाँ अपचलन गरेको प्रमाण पेश गरिएको छ । हामीलाई गलत सावित गर्नुस् न ।’

उनले संसद्भित्र प्रमुख प्रतिपक्षी दलले कुरा उठाइसकेपछि संसदीय छानबिन समिति बनाउनु पर्ने अडान राखे ।

‘यो सरकार पूरै चार वर्ष तपाईंहरू चलाउनुस् । हामीलाई गलत सावित गरिदिनुस्’, उनले भने, ‘सभामुखले संख्याका आधारमा पेलेर हुन्छ? संसदीय छानबिन समिति नबनीकन संसद्को कुनै पनि काम अघि बढ्दैन ।’

थापाले प्रधानमन्त्री र सरकारले गरिरहेको काममा अब विश्वास नरहेको बताए । ‘सरकारका अंगलाई वासिङ मेशिन जस्तो बनाइयो । सरकारले छोपेर र धोएर अब जोगिँदैन’, उनले भने, ‘गृहमन्त्रीले राजीनामा दिनु पर्दैन भनेका हौँ, सरकारकै कारण अप्ठेरो भएको हो । छानबिन अघि नबढेसम्म संसद्‌को कारबाही अब अघि बढ्दैन ।’

कांग्रेस सांसदहरूले आशनबाट उठेर वेल घेराउ गर्दै नाराबाजी गरेपछि सभामुख देवराज घिमिरेले बैठक १५ मिनेटका लागि स्थगित गरेका छन् ।

यो पनि –
महान्यायाधिवक्ता लम्पसारै परिसक्नुभयो : कांग्रेस