काठमाडौं– जनता समाजवादी पार्टी नेपाल (जसपा) विभाजनपछि केन्द्र सरकारमा पनि प्रभाव पर्ने संकेत देखिएकाे छ । पार्टी विभाजनपछि प्रधानमन्त्री पुष्पकमल दाहाल प्रचण्डसँग जसपा नेपालका अध्यक्ष उपेन्द्र यादव असन्तुष्ट  छन् ।

यादव बिहीबार बसेको मन्त्रपरिषद् बैठकमा पनि सहभागी भएका थिएनन् । कारण पार्टी विभाजन नै भएकाे उनी निकट नेताहरू बताउँछन् ।

प्रधानमन्त्रीले सरकारबाट बिदा हुन आदेश दिए उनी जुनसुकै बेला पनि सरकारबाट बाहिरिने तयारीमा छन् । यादवले आफू सरकारमा ‘कम्फर्टेबल नभएको महसुस गरिरहेको उनी निकट नेताको भनाइ छ ।

यादव सरकारबाट बाहिरिए उपप्रधानसहित स्वास्थ्य मन्त्रालयमा नयाँ पार्टी जसपा नेपालका अध्यक्ष अशोक राईको ‘इन्ट्री’ हुने सम्भावना छ । 

राईले सरकारमा जान इच्छा राखिरहेका छन्  । तर यस विषयमा प्रधानमन्त्रीले अहिलेसम्म चासाे दिएका छैनन् । यादवलाई  सरकारबाट फिर्ता गराउन राईले जोडबल गरिरहेकाे स्राेत बताउँछ ।

यता एमाले भने उपेन्द्र बाहिरिए सिके राउत नेतृत्वको जनमत पार्टीलाई सरकारमा सामेल गराउने तयारीमा छ ।

मधेस प्रदेश सरकारमा तलमाथि हुने संकेत देखिए मात्र उपेन्द्र सरकारबाट बिदा हुने स्रोतको भनाइ छ । स्रोतले भन्यो, ‘यो परिस्थिति मिल्दै जान्छ । मधेस सरकार धरापमा छैन हामी किन डराउने र ?’