वीरगञ्ज- पर्साको वीरगञ्ज पुर्‍याइएपछि राष्ट्रिय स्वतन्त्र पार्टीका सभापति रवि लामिछानेको स्वास्थ्य जाँच गरिएको छ ।

जिल्ला प्रहरी कार्यालय पर्सामा चिकित्कहरूले सोमबार अपराह्न स्वास्थ्य जाँच गरेका हुन् ।

वीरगञ्जको नारायणी अस्पतालबाट आएका स्वस्थ्यकर्मीहरूले सभापति लामिछानेको स्वस्थ्य जाँच गर्दा उच्च रक्तचाप देखिएको हो ।

परीक्षणका क्रममा रविको रक्तचाप बढेको पाइएको छ । रक्तचाप बढेर १६०/११० पुगे पाइएको जिल्ला प्रहरी कार्यालय पर्सा स्रोतले जानकारी दिएको छ ।

स्वास्थ्य जाँचपछि उनलाई जिल्ला प्रहरी कार्यालय पर्साको हिरासतमा राखिएको छ । उनलाई जिल्ला सरकारी वकिलको कार्यालयमा लगेर बयान लिने तयारी भएको छ।

सहकारी ठगी प्रकरणमा गत कात्तिक २ गते पक्राउ परेर जिल्ला प्रहरी कार्यालय कास्कीको हिरासतमा रहेका रास्वपा अध्यक्ष लामिछानेलाई सोमबार काठमाडौं ल्याएर पर्सा लगिएको छ ।

वीरगञ्जस्थित हाम्रो सानो पाइला सहकारी संस्थाको बचत हिनामिना प्रकरणमा बयानका लागि सोमबार पोखराबाट काठमाडौं हुँदै रविलाई पर्सा लगिएको हो ।

हाम्रो साइनो पाइला सहकारी संस्थाको ३३ करोड ५० लाख ७० हजार ४२७ रुपैयाँ ठगी भएको भनेर उजुरी परेपछि गत मंसिर १९ गते लामिछानेसहित १४ जनाविरुद्ध पक्राउ पुर्जी जारी भएको थियो ।