काठमाडौं – खाना खाँदा तरकारी मसालेदार भएन भने नेपालीलाई स्वाद नै आउँदैन। तरकारीलाई मिठो बनाउन मसला अनिवार्य आवश्यक छ। विभिन्न खालका मसलाहरुलाई मिक्स गरेर बनाएको तरकारी एकदमै स्वादिष्ट मानिन्छ।

यस्ता मसलाहरु पनि नेपालमा बाहिरबाट नै आयात हुने गर्दछ। सबैभन्दा धेरै मसला खानेमा भारतीयको विशेष चर्चा हुन्छ। छिमेकी देशको प्रभावले पनि नेपालमा धेरै मसलाहरु प्रयोग हुन्छन्। मसालेदार खानेकुराले स्वास्थ्यलाई फाइदा नगर्ने भएपनि मानिसहरु यी चीजको बानी परिसकेका छन्।

चाडवाडका समयमा मसलाको खपत धेरै हुने गरेको छ। अझै दशैंमा शाकाहारी बाहेक अन्यले माछामासुको प्रयोग बढी गर्ने र मासुमा धेरै मसला चाहिने भएका कारण पनि मसलाको आयात बढेको हो।

चालु आर्थिक वर्षको पहिलो महिना साउन र भदौमा मात्रै नौ हजार एक सय ३५ क्विन्टल मसला आयात भएको भन्सार विभागको तथ्यांकले देखाएको छ।

अहिले आउँदै गरेको दशैं–तिहारको समयमा भने दुई महिनाको अवधिमा नेपालमा १९ करोड बराबरको मसला आयात भएको छ। यस्तै, गत आर्थिक वर्षमा भने चार अर्ब नौ करोड ३३ लाख २४ हजार रुपैयाँ बराबरको मसला नेपाल आयात भएको थियो।
यस्ता मसलाहरु नेपालमा चीन, भारत, पाकिस्तान, मलेसिया, भियतनाम, साउदीअरेबिया आदि देशहरुबाट आउने गर्छ।

कुन कुन मसला प्रयोग हुन्छ नेपालमा ?
नेपालमा सबैभन्दा प्रयोग हुने मसलामा जिरा, धनियाँ, मेथी, खुर्सानी आदि सबैतिर प्रयोग हुने मसला हुन्। यी मसलाहरु जुनसुकै तरकारीमा हाल्न योग्य हुन्छ।

यस्तै, दालचिनी, टिम्मुर, बेसार, हिंग, अलैँची, जाइफल, कडीपत्ता, लसुन, अदुवा, तोरीको दाना जस्ता विभिन्न मसला पनि प्रयोग हुने गरेका छन्।