काठमाडौं- नेपाली कांग्रेसका उपसभापति धनराज गुरुङ जोडिएको सहकारीको बचत हिनामिना प्रकरणमा राष्ट्रिय स्वतन्त्र पार्टी (रास्वपा) ले प्रश्न उठाएको छ।

रास्वपाबाट प्रतिनिधि सभा सदस्य गणेश पराजुलीले उपसभापति गुरुङ सहकारी ठगीमा मुछिएको भन्दै संसद्को ध्यानाकार्षण गराउने क्रममा डिभोर्सबारे पनि प्रश्न उठाएका हुन् ।

पूर्वकानुन मन्त्रीसमेत रहेका गुरुङविरुद्ध प्रहरीको केन्द्रीय अनुसन्धान व्यूरो (सीआईबी) मा उजुरी परेको बताउँदै पराजुलीले उजुरी नहुँदा पनि रास्वपा सभापति लामिछानेलाई सदनमा गरिएको व्यवहार सम्झाए ।

‘मितेरी बचत तथा ऋण सहकारी संस्थाका अध्यक्ष कुम्भराज गुरुङले आफने संस्थाको करिब १५ करोड रकम हिनामिना गरेकोमा माननीय धनराज गुरुङ र ज्योति गुरुङविरुद्ध ठगी गरेको दाबीसहित उजुरी दर्ता गराउनु भएको रहेछ’, उनले भने, ‘माननीय धनराज गुरुङमाथि छानबिन हुन्छ कि हुँदैन भनेर म कांग्रेसका अरू माननीयहरूलाई प्रश्न गर्न चाहन्छु ’

सहकारीको ठगी लुकाउन धनराजले सम्बन्धविच्छेदसमेत गरेको कुरा बाहिएको पराजुलीले दाबी गरे।

‘सहकारी ठगी छानबिनको माग गर्दै अब नेपाली कांग्रेसका माननीयज्यूहरूले संसद्को रोस्ट्रम र वेल घेराउ गर्नुहुन्छ कि गर्नुहुँदैन ? यसमा पनि दोहोरो मापदण्ड अपनाउने हो ?’ पराजुलीले सोधे ।