काठमाडौं- नेकपा (माओवादी केन्द्र) का सांसद लेखनाथ दाहालले नेकपा एमालेका अध्यक्ष केपी शर्मा ओली माओवादीसँगको सहकार्य तोडेकोबारेमा प्रश्न गरेका छन् ।

प्रतिनिधिसभाको सोमबार बसेको बैठकमा बोल्दै दाहालले एमाले अध्यक्ष ओलीले माओवादीसँग के कारण सहकार्य गरेको र के कारणले भत्काएको ? जवाफ दिनुपर्ने बताएका हुन् ।

‘केही दिनदेखि सदनमा एउटै विषयमा छलफल चलिरहेको छ । मूलभूत रुपमा कांग्रेस सभापति शेरबहादुर देउवा र एमाले अध्यक्ष केपी ओलीबीचमा भएको ७ बुँदे सहमति बदनियतपूर्ण छ। त्यसले पैदा गरेको राजनीतिक तरंगले सदनलाई पनि तानेको छ’, उनले भने, ‘हामी सबैलाई थाहा छ चार महिनाअगाडि कमरेड ओलीकै पटक पटकको प्रस्तावमा कम्युनिष्टहरू मिल्ने कुरा भयो, उहाँको प्रस्ताव प्रचण्डले पनि स्वीकार्नुभयो, विश्वास गर्नुभयो । त्यो विश्वासको जगमा सरकारको सहकार्य हुनुपर्छ भन्नुभयो, त्यहीअनुसार अघि बढ्यौँ । तर, अहिले सहकार्य तोड्नुभयो । मैले ओलीलाई प्रश्न गर्नैपर्छ–तपाईंले कुन उद्देश्यले सहकार्य तोड्नुभयो ?’

सांसद दाहालले सरकारले सुशासनको कामलाई निरन्तरता दिएको पनि बताए । तर, एमालेले के कारणले सत्ता सहकार्य तोडेको जवाफ दिनुपर्ने उनको जिकिर छ ।

दाहालले नक्कली शरणार्थी प्रकरणमा विचौलियको भूमिका खेलेर हाल जेलमा रहेका बेचन झा को हुन भनेर बालकोट र बूढानीलकण्ठ दुवैलाई राम्रोसँग थाहा भएको टिप्पणीसमेत गरे ।

‘बेचन झा को हुन ? हामीलाई थाहा छैन । नेपाली जनतालाई थाहा छैन । तर, उनीबारे बालकोट र बूढानीलकण्ठलाई राम्रोसँग थाहा छ’, उनले भने, ‘बेचन झाको गिरफ्तारीपछि उनको बयान असार २८ गतेसम्म नलिनु, पछि लिनु भनेर आदेश जारी भएको कुरा सुन्नमा आएको छ ।’