दोलखा- दोलखा जिल्लाको तामाकोशी गाउँपालिकाको केन्द्र मतदानबाट जफेको मानेडाँडा तोकिएको छ । पालिकाको केन्द्र ११औँ गाउँ सभाबाट मतदानमार्फत वडा नम्बर-३ काे जफेस्थित डाँडागाउँ तोकिएको हो ।

उक्त केन्द्र हुन्छ भने पक्षमा जम्मा खसेको ३८ मत मध्ये २९ मत प्राप्त भएको निर्वाचन मण्डलका सदस्य रामकुमार कार्कीले जानकारी दिए ।

कार्की अनुसार हुँदैन भन्ने पक्षमा ५ मत खसेको थियो । त्यस्तै खाली ठाउँमा दुई मत र दुई मत बदर भएको जनाइएको छ । दुई तिहाइ मतका लागि २६ मतको आवश्यक थियो । तर मानेडाँडाको लागि २९ मत खसेको हो ।

लामो समय देखि केन्द्र तोक्ने विषयमा विवाद झेल्दै आएको पालिकाले ७ वर्षपछि बहुमत जुटाउँदै केन्द्र तोकेको हो । यसअघि छौँडे र मालु डाँडागाउँको पक्षमा २०/२० मत खसेको थियो ।

सङ्घीय संरचनामा गएपछि गाउँपालिकाको दोस्रो नेतृत्वले निर्वाचित भएको २० महिनापछि केन्द्र तोक्न सफल भएको हो ।

कानुनी प्रावधान अनुसार गाउँ सभाको दुई तिहाइ बहुमतले केन्द्र तोक्न सक्ने व्यवस्था भएअनुसार उक्त स्थानमा बहुमतले केन्द्र तोकेको हो ।

राज्य पुनसंरचना आयोगले पनि पालिकाको केन्द्र मानेडाँडा सिफारिस गरेको थियो ।

सुबास बस्नेत