काठमाडौं- अपराजित रहेको जनकपुर बोल्ट्सले नेपाल प्रिमियर लिग (एनपीएल) क्रिकेटमा लुम्बिनी लायन्सविरुद्ध १३७ रनको सामान्य स्कोर गरेको छ ।

सुरुमा आक्रमक ब्याटिङ गरेको जनकपुरलाई लुम्बिनीले बलिङमा कमब्याक गर्दै दबाबमा राख्दा समान्य स्कोर बनेको हो ।

त्रिवि क्रिकेट मैदानमा टस हारेर पहिले ब्याटिङमा गएको जनकपुरले निर्धारित २० ओभरमा ९ विकेट गुमाउँदै १३६ रनमात्रै बनाउन सक्यो ।

कुनै बेला जनकपुर ११ ओभरमा १ विकेटको क्षतिमा ८७ रनमा थियो । तर त्यसपछि उसलाई लुम्बिनीले कसिललो बलिङमार्फत् दबाबमा राख्न सफल भयो।

जनकपुरका लागि कप्तान अनिल साहले सर्वाधिक ४५ रन बनाए लाहिरु मिलान्थाले २७, शुभ कंसाकारले २२ र आसिफ शेखले १६ रन जोडे । अरु खेलाडी दोहोरो अंक छुन असफल रहे।

लुम्बिनीका लागि अभिशेष गौतमले तीन विदेशी खेलाडीलाई पवेलियन फर्काउन सफल भए । उता कप्तान रोहित पौडेलले पनि २ विकेट झारे ।

लुम्बिनीका साद बिन जफरको नाममा पनि पनि २ विकेट रह्यो । यसअघिका तीनै खेल जितेको जनकपुर लिगको दोस्रो स्थानमा छ । तर एनपीएलको पहिलो सिजन नै लुम्बिनीका लागि निराशाजनक छ । उसले यसअघिका सबै तीन खेल हारेको छ ।