काठमाडौं– नागरिक उन्मुक्ति पार्टीको भातृ संगठन ‘नागरिक पत्रकार समाज’ का अध्यक्ष अश्विन दानी पक्राउ परेका छन् । 

आपराधिक लाभ लिने उद्देश्यसहित योजनाबद्ध तवरले डर त्रास देखाई रकम माग गरेको आरोपमा गोरखा नगरपालिका ३ घर भई हाल काठमाडौँको बूढानीलकण्ठ नगरपालिका १२ बस्ने दानीलाई प्रहरीले पक्राउ गरेको हो ।

पर्यटन राज्यमन्त्री अरुण कुमार चौधरीका प्रेस सल्लाहकार समेत रहेका उनलाई प्रहरीले काठमाडौं कपनबाट पीडितसँग लिएको रकमसहित असोज २२ गते पक्राउ गरेको थियो ।

उनीमाथि नुवाकोटका चन्द्रबहादुर तामाङले जाहेरी दिएका थिए । 

उन्मुक्तिले गत असार पहिलो साता दानीको संयोजकत्वमा ३१ सदस्यीय पत्रकार समाजको तदर्थ कमिटी गठन गरेको थियो ।

पार्टीका अध्यक्ष रञ्जिता श्रेष्ठ चौधरीको अध्यक्षतामा पार्टी कार्यालय महाराजगञ्जमा बसेको बैठकले दानीको नेतृत्वमा पत्रकारहरूको तदर्थ कमिटी गठन गरेको थियो ।