काठमाडौं- सर्लाहीका एकजना युवकले प्रेमिकालाई घुम्न जाऊँ भनेर सुन्दरीजलमा पुर्‍याएपछि हत्या गरेको खुलेको छ।

महानगरीय प्रहरी परिसर काठमाडौंले प्रेमिकाको हत्या गरेको अभियोगमा उनका प्रेमी र साथीलाई पनि पक्राउ गरेको छ।

काठमाडौं महानगरपालिका-३ बसुन्धारा बस्ने सिराहा घर भएकी राम दुलारी नामकी युवतीको हत्यामा संलग्न भएको अभियोगमा प्रहरीले उनका प्रेमी भनिएकासहित २ जनालाई शनिबार पक्राउ गरेको हो ।

पक्राउ पर्नेमा सर्लाहीको चक्रघट्टा गाउँपालिका-३ बस्ने ४० वर्षीय रामविनय महरा र काठमाडौं महानगरपालिका-३ बसुन्धारा बस्ने सर्लाही बसगरिया गाउँपालिका-५ का २४ वर्षीय सन्तोष राम महरा छन् । रामविनय ज्यान गुमाएकी युवतीका प्रेमी रहेको खुलेको छ।

प्रहरीका अनुसार ती युवतीको गोकर्णेश्वर नगरपालिका-१ सुन्दरीजलस्थित बोक्से दहको ढुंगाको च्याप बिहीबार स्थानीयले देखेका थिए ।

त्यसपछि जिल्ला प्रहरी परिसर काठमाडौं र प्रहरी वृत्त बौद्धको प्रहरीले घटनामा संलग्न भएको अभियोगमा दुवैजनालाई काठमाडौं महानगरपालिका-३ बसुन्धाराबाट पक्राउ गरेको हो ।

प्रारम्भिक अनुसन्धानका रामविनयको सन्तोष राम पनि संलग्न भएर युवतीलाई सुन्दरीजल पुर्‍याएपछि डिलबाट धकेलेर लडाएका थिए । महानगरीय प्रहरी परिसर काठमाडौंका प्रवक्ता एसपी नवराज अधिकारीका अनुसार डिलबाट लडाएपछि युवतीको टाउकोमा ढुंगाले हानेर ज्यान लिइएको थियो ।

उनीहरूले ती रामविनयकी प्रेमिका रहेकी ती युवतीको हत्यापछि बोक्से दहको ढुंगाको च्यापमा शवलाई लुकाइदिएका थिए । रामविनयले घुम्न जाने प्रस्ताव गरेपछि सुन्दरीजल पुगेकी प्रेमिकाले प्रेमी र उनका साथीको हातबाट ज्यान गुमाउनु परेको निष्कर्ष प्रहरीले निकालेको छ। दुवैजनालाई कर्तव्य ज्यान अभियोगमा आइतबार जिल्ला अदालत काठमाडौंबाट म्याद लिइएको छ ।

सडकमा बसेर जुत्ता सिलाउने रामविनय र मजदुरी गर्ने राम दुलारी प्रेमसम्बन्धमा थिए । तर यी दुईजनाबीचको विवादबारे प्रहरीले केही खुलाएको छैन ।

प्रहरीले तत्काल मृतक युवतीको नाम, थर, वतन खुल्ने विवरण तथा कागजात केही फेला नपरेपछि अनुसन्धानमा समस्या भएको जनाएको छ । तर प्राविधिक पक्ष तथा स्थानीयले दिएको सूचना र सीसीटीभी फुटेजकासमेत आधारमा अनुसन्धान गर्ने क्रममा ती दुईजनलाई पक्राउ गर्न सफल भएको हो ।