काठमाडौं । अराजकता बढेको भन्दै पाकिस्तानको खैबर पख्तुनख्वा प्रान्तस्थित दक्षिणी वजिरिस्तान जिल्लामा स्थानीयहरुले प्रदर्शन गरेका छन् ।

दक्षिणी वजिरिस्तानमा अराजकता, गैरन्यायिक हत्या र चन्दा आतंक बढेको भन्दै हजारौँ स्थानीय सडकमा उत्रेका हुन् ।

पाकिस्तानबाट प्रकाशित हुने एक्सप्रेस ट्रिब्युनका अनुसार दक्षिण वजिरिस्तानका वाना, बजउरजस्ता क्षेत्रमा भएको प्रदर्शनमा हजारौँ स्थानीय बासिन्दाको उपस्थिती रहेको थियो । प्रदर्शनको आयोजना मुत्थैदा सियासी अमन पसवुन नामक संस्थाले गरेको ट्रिब्युनले जनाएको छ ।

प्रदर्शनमा स्थानीय राजनीतिक नेता, सामाजिक अभियन्ता, जातीय अगुवा, नागरिक समाजका प्रतिनिधि, विद्यार्थी, मजदुर र सर्वसाधारणको सहभागिता रहेको जनाइएको छ । प्रदर्शनकारीले अराजकताको अन्त्य गर्न, शान्ति सुरक्षाको प्रत्याभूति गर्न सरकारसँग माग गरेका थिए ।