काठमाडौं – प्रमुख सत्तारूढ नेकपा (एमाले) का अध्यक्ष केपी शर्मा ओलीले पार्टी फुटाउनेहरूको हालत खराब हुँदै गएको बताएका छन् ।

एकीकृत समाजवादी पार्टीका अध्यक्ष माधवकुमार नेपालतिर लक्षित गर्दै उनले बुधबार एक कार्यक्रममा कडा टिप्पणी गरेका हुन् ।

एमाले नेतृत्वको सरकार ढालेर दक्षिणपन्थीहरूको हातमा सरकार बुझाउनेहरूको हालत अहिले खराब भएको भन्दै नेपाललाई कटाक्ष गरेका हुन् ।

एमाले कपिलवस्तु जिल्ला अधिवेशन बुधबार उद्घाटन गर्दै पूर्व प्रधानमन्त्री ओलीले अब पार्टीभित्र कुनै गुट-उपगुट स्वीकार्न नसकिने पनि बताए ।

गुट बनाउनेहरुविरुद्ध नेतृत्व अब कडा रुपमा प्रस्तुत हुने चेतावनी दिए त्यही सम्मेलनमार्फत दिएका छन् ।

‘हिजो गलत मनसायबाट पार्टी फुटाउनेहरू कहीँबाट सञ्चालित थिए । अहिले उनीहरूको के हालत भएको छ ? केही स्वार्थी व्यक्तिहरू पार्टीमा हुँदा कति धेरै क्षति पुर्‍यायो भन्ने सबैलाई प्रष्ट छ’, ओलीले भने, ‘पार्टीभित्र गुट बनाउने छुट कसैलाई छैन, यसले कसैलाई फाइदा हुँदैन, पार्टीमा फाटो ल्याउँछ । एमालेलाई गुटबन्दी स्वीकार्य छैन । यसबारे सबै नेता-कार्यकर्ता स्पष्ट हुनुपर्छ । अब गुटबन्दीविरुद्ध नेता-कार्यकर्ता एक भएर लागौँ । गुटबन्दी मुर्दावाद भन्न थालौँ ।’

ओलीले एमाले विभाजनका बेला पनि कपिलवस्तुले सबै षड्यन्त्रलाई चिरेर जवाफ दिएको बताए । अहिले पनि कपिलवस्तु पार्टी बलियो बनाउने काममा दृढ रहेको भन्दै सम्मान देखाए ।

‘हिजो एमालेभित्रका केही स्वार्थीलाई पचेन, डाहा भयो, उनीहरू कहाँबाट सञ्चालित भएका हुन् ? गलत मनसायले पार्टी फुटाए, कम्युनिष्ट पार्टीको सरकार ढालेर दक्षिणपन्थीलाई बुझाए’, ओ‌लीले भने, ‘अझै पनि महसुस गरेका छन् वा छैनन् ? कपिलवस्तुले ती सबै षडयन्त्रविरुद्ध एकजुट भएको थियो । पार्टी केन्द्रले कपिलवस्तुलाई उच्च सम्मान गरेको छ । अब पनि त्यो सम्झनुपर्यो‍ ।’

उनले आफूहरूको काँधमा लोकतन्त्र प्रवर्द्धन गर्ने, सुशासन ल्याउने तथा विकास र समृद्धिको जिम्मेवारी आएको बताए । त्यसका लागि अब एमालेको एकल सरकार बनाउन आवश्यक रहेको ओलीले जिकिर गरे ।