काठमाडौं– कोशी प्रदेशमा सरकारको दाबीका लागि नेकपा एमाले र नेकपा माओवादी केन्द्रका सबै सबै सांसदहरूको सनाखत गराइने भएको छ ।

गत असोजमा एमाले र माओवादी दुवैको समर्थनमा मुख्यमन्त्री बनेका नेपाली कांग्रेसका केदार कार्कीले अल्पमतमा परेर पनि विश्वासको मत नलिएपछि नयाँ सरकारमा दाबीका लागि सबै सांसदको सनाखत गराउन लागिएको हो ।

कार्की प्रदेश सभाबाट विश्वासको मत लिन तयार नभएपछि प्रदेश प्रमुख परशुराम खापुङकले नयाँ सरकार गठनका लागि आह्वान गर्ने तयारी गरेका छन् ।  बुधबार मात्रै एमाले र माओवादीका नेताहरूले खापुङलाई भेटेर नयाँ सरकार गठनका लागि आह्वान गर्न भनेका छन् ।

तर बुधबार मुख्यमन्त्री कार्कीले जेठ ११ गते बस्ने गरी प्रदेश सभाको बजेट अधिवेशन आह्वानका लागि प्रदेश प्रमुखकहाँ सिफारिस गरेका छन् ।

सरकार अल्पमतमा गएर संविधान अनुसार विश्वासको मत नलिएकोले प्रदेश प्रमुख खापुङले नयाँ सरकार गठनको आह्वान तयारी गरेको माओवादी संसदीय दलको नेता इन्द्र आङ्बोले बताए ।

सरकारमा सहभागी दल र सांसदहरूले समर्थन फिर्ता लिएको ३० दिनभित्र मुख्यमन्त्रीले विश्वासको मत लिनुपर्छ ।

प्रदेशसभा सचिवालयको पत्र, प्रदेशसभाका ९३ सदस्यमध्ये बहुमत सांसद ५२ सांसदले नयाँ सरकार गठन गर्न गरेको आग्रह, संविधानको व्यवस्था तथा सर्वोच्च अदालतको आदेश र महान्यायाधिवक्ता कार्यालयको रायसमेतका आधारमा नयाँ सरकार गठनको आह्वान गर्ने तयारीमा प्रदेश प्रमुख छन् ।

दुई दल एमाले माओवादीले संविधानको धारा १६८ अनुसार सरकार गठन हुनुपर्ने माग गरेका छन् । तर, उपधारा २ कि ५ अनुसार भन्ने उनीहरूले स्पष्ट पारका छैनन् ।