काठमाडौं-  जनता समाजवादी पार्टी (जसपा) नेपाल विभाजित गरिएपछि अध्यक्ष उपेन्द्र यादव तनावमा छन् ।

उनको त्यो तनाव बुधबार पार्टी केन्द्रीय कार्यालय बालकुमारीमा आयोजित पत्रकार सम्मेलनमा पनि प्रष्टै देखिन्थ्यो । नवौँ पटकसम्मको पार्टी विभाजन झेलिसकेका उनी पत्रकार सम्मेलनअगावै निराश मुद्रामा देखिए ।

पत्रकार सम्मेलनका क्रममा यादवले आइतबार अशोक राईले सात सांसदसहित पार्टी विभाजन गरेको प्रसंग झिक्दै जो जहाँ गए पनि पार्टीको महाधिवेशन जेठ २८ बाटै सुरु हुने बताएका छन् ।

पत्रकारहरुको प्रश्नको उत्तर दिँदै यादवले पार्टी फुटविरुद्ध कानुनी चुनौती दिन सर्वोच्च अदालत जानेसमेत बताए ।

तर उनले जसपा विभाजनका कारण लागेको पीडा अभिव्यक्त गर्दै ठूलो भाग खोज्नेहरू पछुताउने तर्क गरे ।

‘माहाधिवेशनपछि पार्टी अझै मजबुत र बलियो भएर जान्छ । प्रधानमन्त्रीलाई दिएको विश्वास र सरकारबाट बिदा हुने कुनै सम्भावना छैन’, उनले भने, ‘ठूलो भाग खोज्न गएकाहरू पछुताउने छन् ।’

उनले पत्रकारहरूसँग अशोक राईहरूले छाडेर गए पनि पार्टीको महाधिवेशन जेठ २८ देखि ३० गतेसम्म गरेरै छाड्ने जिकिर गरे ।

‘हाम्रो मात्रै होइन, कम्युनिस्ट पार्टीहरू पनि फुटेका फुट्टयै छन्’, उनले थपे, ‘व्यक्तिगत स्वार्थमा पार्टी फुटाउनेहरू पनि देखिएका छन् ।तर उनीहरू पछुताउने दिन आउँछ।’

यादवले लाखौँ पार्टी सदस्य र नेताहरू आफूसँगै रहेको बताउँदै अझै पनि दुईतिहाइ पकड कायमै रहेको दाबी गरे ।

‘लाखौँ पार्टी सदस्य र नेताहरू अहिले पनि हामीसँगै छन् । केन्द्रीय कमिटीमा दुईतिहाइ बढी नेता हाम्रै साथमा छन्, कार्यकारिणी समितिका बहुमत सदस्य यहीँ हुनुहुन्छ’, उनले भने, ‘छाडेर गएका ७ जना सांसदलाई मन्त्री बनाइदिने प्रलोभन देखाए । खर्चसमेत ठूलै गरेछन् । खर्च गरेरै पार्टी फुटाए तर त्यसले जनआधार पाउन सक्दैन । हाम्रै पार्टी भोलि पनि बलियो भएर जानेमा कुनै शंका छैन ।’