काठमाडौं– मोडल नीति शाह डेब्यू फिल्म ‘खजुरे ब्रो’को प्रिमियर अघि हँसिलो मुद्रामा थिइन् । लामो अन्योलपछि फिल्म खेलेकी उनी प्रिमियरमा खुशी हुने नै भइन् । अझ, डेब्यू फिल्मको प्रिमियर कलाकारका लागि विशेष हुन्छ नै !

फिल्ममा नीतिभन्दा अन्य कलाकार हाबी छन् । प्रिमियरपछि फिल्मले अपेक्षित रूपमा सकारात्मक प्रतिक्रिया पाएन । फिल्म माथिको जस अपजस पनि एक्ली ‘स्टार’ कलाकार भएकीले नीतिमाथि नै थोपरिने निश्चित छ । तर, फिल्ममा उनको ‘स्क्रिन टाइम’ नै थोरै छ ।

खैर ! छोरीको विशेष समयको प्रत्यक्षदर्शी बन्न नीतिका आमा–बुबा पनि हलमा पुगेका थिए । नीतिका बुबा नवल शाहले फिल्ममा छोरीको भूमिका थोरै रहेको महसुस भएको प्रतिक्रिया दिए । 

उनले नीतिलाई शीर्ष भूमिकामा नपाएको बताउँदै थपे, ‘मलाई चाहिँ आजको फिल्म हेर्दा आगामी फिल्ममा छोरीले लिड रोलमा काम गरोस् भन्ने लाग्यो । समाजमा प्रभाव पार्न सक्ने खालको भूमिकामा काम गरोस् भन्ने लाग्यो ।’

यद्यपि छोरीको बाल्यकालदेखिको सपना र पहिलो प्रयासमा आफू सन्तुष्ट रहेको उनको प्रतिक्रिया छ । त्यस्तै, नीतिको आमा शैलेजा शाहले छोरीको कामप्रति सन्तुष्ट रहेको बताइन् । उनले समग्र फिल्मलाई शतप्रतिशत अंक दिइन् ।  उनले भनिन्, ‘यो फिल्मलाई म पाँचमा पाँच नै दिन्छु ।’

बाबुआमासँगै बसेर प्रिमियर हेरेकी नीति चाहिँ फिल्ममा रहेको आफ्नो चुम्बनको द‌ृश्य आउँदा असहज महसुस भएको बताउँदै थिइन्‌ ।