काठमाडौं – नेपाली कांग्रेसका नेता शेखर कोइरालाले राष्ट्रियसभा निर्वाचनका लागि पार्टीभित्र न्यायोचित टिकट वितरण नभएको बताएका छन् ।
सोमबार सामाजिक सञ्जालमार्फत कोइरालाले न्यायोचित टिकट वितरण गर्न पार्टी निणर्य असमर्थ रहेको बताएका हुन् ।
उनले लेखेका छन्, ‘ न्यायोचित टिकट बितरण गर्न असमर्थ पार्टी निणर्यमा मैले गल्ती–कमजोरी गरेको रहेछु भने म त्यसलाई स्वीकार्दै साथीहरुको सल्लाह र सुझावबाट भबिष्यमा अगाडी बढ्ने प्रण गर्दछु । मेरो अभियान पार्टीमा अवसरको न्यायोचित बितरण होस् भन्ने नै हो ।’
साथै उनले पार्टीबाट छानिएका उमेदवारलाई जिताउन आग्रह गरेका छन् । उम्मेदवार चयन प्रक्रिया सहज नभएको भन्दै कोइरालाले सिमित सिटका कारण पार्टीका सक्षम नेताहरुलाई न्याय गर्न चाहेर पनि सम्भव नभएको उल्लेख गरेका छन् ।
‘सत्ता गठबन्धनमा आवद्ध दलहरुबाट राष्ट्रिय सभामा उम्मेदवारी दर्ता गराउनु भएका सबैलाई जिताउनु पर्ने अभिभारा पनि हामीसँग छ । राष्ट्रिय सभा सदस्यको उम्मेदवार चयन प्रक्रिया सहज थिएन । कांग्रेस जस्तो लामो ईतिहास भएको संघर्षशील पार्टीमा धेरै निष्ठावान, निःस्वार्थ, योग्य र सक्षम आकांक्षी साथीहरुको सुची लामो थियो । यसर्थ सिमित सिटका कारण पार्टीका साथीहरुलाई न्याय गर्न चाहेर पनि सम्भव भएन’ उनले लेखेका छन् ।
यस्तै कोइरालाले सत्ता गठबन्धनमा आवद्ध दलहरुबाट राष्ट्रिय सभामा उम्मेदवारी दर्ता गराएका सबै उम्मेदवारलाई जिताउनु पर्ने बताएका छन् । सत्ता गठबन्धनबाट कांग्रेसले प्राप्त गरेको १० सिटमध्ये कोइराला पक्षले तीन सिट प्राप्त गरेको थियो ।
यो पनि…
राष्ट्रियसभा उम्मेद्वार चयनमा कांग्रेस महामन्त्री थापाको फरक मत के हो ?
प्रतिक्रिया