काठमाडौं – अमेरिकाका ४७औं राष्ट्रपति निर्वाचित डोनाल्ड ट्रम्पका कारण विश्वभर सुनचाँदीको भाउमै असर परेको छ । राष्ट्रपति निर्वाचन भएको यो साताभर विश्वमा सुन र चाँदीको भाउमा उतारचढाव देखिएको हो ।

अमेरिकी राष्ट्रपतिको निर्वाचनको परिणामसँगै अमेरिकी डलरको विनिमय दरमा देखिएको उच्च रेकर्ड र फेडरल रिजर्भले ब्याजदर घटाउँदाको प्रभाव सुनको मूल्यमा परेको हो ।

नेपाली बजारमा पनि यो साता सुनको मूल्यमा उतारचढाव आयो । साताको पहिलो दिन आइतबार र दोस्रो दिन सोमबार तिहार पर्वका कारण सुनको दरभाउ प्रकाशन भएको थिएन ।

साताको तेस्रो दिन मंगलबार प्रति १० ग्राम एक लाख ४४ हजार २०५ रुपैयाँ पुग्यो । साताको चौथो दिन बुधबार प्रति १० ग्राम सुनको मूल्य एक लाख ४४ हजार ४६० रुपैयाँ पुग्यो ।

यसपश्चात्‌ साताको पाँचौं दिन बिहीबार मूल्य घटेर प्रति १० ग्राम सुनको मूल्य एक लाख ४१ हजार ३० रुपैयाँ कायम भयो । साताको पछिल्लो कारोबार भएको दिन शुक्रबार भने फेरि बढेर प्रति १० ग्राम एक लाख ४२ हजार ७४५ रुपैयाँ पुग्यो ।

यो मूल्य साताको तेस्रो अर्थात्‌ बजार खुलेको पहिलो दिनको तुलनामा पछिल्लो कारोबार भएको दिन शुक्रबार प्रति १० ग्राम एक हजार ४६० रुपैयाँले कम हो ।

यो साता नेपाली बजारमा चाँदीको मूल्य पनि सामान्य घटेको छ । साताको तेस्रो दिन मंगलबार प्रति १० ग्राम एक हजार ७४० रुपैयाँ ५० पैसा पुगेको मूल्य साताको पछिल्लो कारोबार भएको दिन शुक्रबार प्रति १० ग्राम १ हजार ६ सय ९७ रुपैयाँ ५० पैसा कायम भएको नेपाल सुनचाँदी व्यवसायी महासङ्घले जनाएको छ ।