काठमाडौं – चीन ऊर्जा उत्पादनका लागि कोइलामा निर्भर रहँदै आएको छ । पछिल्लो समय चीनले कोइलाबाट सञ्चालन हुने ऊर्जा केन्द्रको विस्तार गर्न थालेको छ । यसबाट कार्बन उत्सर्जनको अवस्था अझ भयावह बन्दै जाने अनुमान गरिएको छ ।

चीनले विद्युत उत्पादनका लागि कोइलाको खपत घटाउने बाचा गरेपनि व्यवहारमा त्यसो देखिएको छ । पछिल्लो तथ्यांकअनुसार यस वर्षको सेप्टेम्बर महिनामा चीनले ४ करोड ७५ लाख टन कोइला आयात गरेको छ ।

यति मात्रै होइन, आफ्नो देशबाहिर पनि चिनियाँ कम्पनीले कोइलाबाट सञ्चालन हुने ऊर्जा केन्द्रको निर्माण गरिरहेका छन् । चीनले विभिन्न २८ मुलुकमा १ सय ३ वटा यस्ता ऊर्जा केन्द्र स्थापना गर्ने लक्ष्य अघि सारेको छ । यसले वायुमण्डलमा ४३ करोड टन बराबरको कार्बन उत्सर्जन भएको आँकलन गरिएको छ ।

सन् २०२३ मा विश्वमा हालसम्म कै सबैभन्दा उच्च कोइला खपत भएको थियो । उक्त अवधिमा विश्वव्यापी कोइला खपतको कुल ६० प्रतिशत चीनले खपत गरेको थियो ।

सन् २०२३ मा चीनले ३.७ गिगावाट ऊर्जा उत्पादन क्षमता भएका कोइलाबाट सञ्चालन हुने ऊर्जा केन्द्र बन्द गराएको थियो । तर, सोही अवधिमा कोइलाबाट सञ्चालन हुने ४७.४ गिगावाट उत्पादन क्षमताका ऊर्जा केन्द्र स्थापना गरेको छ ।