काठमाडौं– नेपाल कम्युनिष्ट पार्टी( बहुमत)का महासचिव धर्मेन्द्र बास्तोलाले मोहन बैद्यमा पुरातनवादी चिन्तन देखिएकाले क्रान्तिकारी कम्युनिस्ट पार्टीसंगको एकता असफल भएको बताएका छन् । 

बुधबार काठमाडौंमा पत्रकार सम्मेलन गर्दै बास्तोलाले एकताका क्रममा संकिर्णवादी, पुरातनवादी रुझान देखा परेकाले वैद्य नेतृत्वको क्रान्तिकारी कम्युनिस्ट पार्टीसंगको एकता असफल भएको बताएका हुन् ।

पुराना मान्यताको खारेजी गर्नु तथा राजनीतिक कार्यदिशा र कार्यनीतिमा व्यापक रूपान्तरण गर्ने लक्ष्यका साथ पार्टी एकता गरेपनि एकताको प्रारम्भिक दिनहरूबाट बैद्यबाट सहमति उलंघनको कार्य सुरु भएको उनले आरोप लगाए ।

उनले अहिलेका लागि पार्टी एकता असफल भएपनि पुराना प्रवृतिलाई सच्चाइएको अवस्थामा पुनः एकताका लागि आफूहरू खुल्ला रहेको स्पष्ट पारे ।

उनले आफ्नो पार्टीले संगठनात्मक पुनर्गठन, राजनीतिक पुनर्गठन, आन्दोलन, चिन्तन प्रणाली र संस्कृतिमा पुनर्गठनको अभियान संचालन गर्ने निर्णय गरिएको जानकारी दिए ।

त्यस्तै नेकपा बहुमतले आगामी पौष ११ गते माओ दिवसको सन्दर्भ पारेर नर्वौ महाधिवेशनको मिति निर्धारण गर्दै ५ हजार ५ सय ५५ स्वयंसेवक परिचालन गर्ने निर्णय गरेको जनाएको छ । 

यता क्रान्तिकारी कम्युनिस्ट पार्टीले भने पार्टी अनुशासन तथा सांगठनिक पद्धतिका विरुद्ध गुटवादी तथा फुटवादी गतिविधि सञ्चालन गरेको भन्दै धर्मेन्द्र बास्तोला लगायतका नेताहरूलाई निष्कासन नै गरिसकेको छ ।