काठमाडौँ– राष्ट्रियसभा सदस्य निर्वाचनका लागि सत्तारुढ गठबन्धमा सिटको छिनोफानो गर्न सकस भएको छ । आज प्रधानमन्त्री निवास बालुवाटारमा बसेको गठबन्धनका चार दलको बैठकमा राष्ट्रियसभामा खाली हुने १९ सिटका लागि छलफल भए पनि निचोडमा पुग्न सकेको छैन ।

आजको छलफलमा कांग्रेसलाई १०, माओवादी केन्द्रलाई ६, एकीकृत समाजवादीलाई २ र जनता समाजवादी पार्टी (जसपा) लाई १ सिट बाँड्ने खाका तयार भएको कांग्रेस नेता रमेश लेखकले जानकारी दिए । तर यो भागबन्डाबारे पार्टीमा पुनः एक पटक छलफल गरेर निर्णय लिने बताइएको छ ।

गठबन्धनको प्रारम्भिक बैठकका नागरिक उन्मुक्ति पार्टी र जनमतलाई १–१ सिट दिने सहमति भएको थियो । तर अन्य दल लोकतान्त्रिक समाजवादी पार्टी (लोसपा) र राष्ट्रिय जनमोर्चाले पनि सिट मागेपछि काङ्ग्रेसले अडान लिएको हो ।

स्रोतका अनुसार राजमोलाई मनोनीत सांसद दिने पनि छलफल भएको छ । राजमोकी उपाध्यक्ष दुर्गा पौडेललाई मनोनीत गर्ने छलफल चलेको छ ।

माओवादीका महासचिव देव गुरुले भने, ‘खाका बनेको छ । पार्टीमा पनि अन्य साथीहरूसँग सल्लाह गर्नु भनेर दलहरूलाई भनिएको छ ।’ गुरुङले थपे, ‘मिलाउने काम भइरहेको छ । फाइनल निर्णय भएको होइन ।  सहमति कै प्रक्रियामा छ ।’

यसैबीच, सिट नपुगेको भन्दै नेकपा एकीकृत समाजवादी र जसपा बैठक स्थलबाट बाहिरिएका छन् । नेकपा समाजवादीले ३ सिट मागेको छ भने जसपाले २ सिट मागेको छ । 

गठबन्धनमा समाजवादीलाई २ र जसपालाई १ सिट आफ्नो भागको मात्र दिने प्रारम्भिक निर्णय भएपछि असहमति जनाएर बैठकबाट निस्किएका हुन् ।

यस्तै, जसपा अध्यक्ष उपेन्द्र यादवले पनि असहति जनाउँदै भने, ‘मिल्ने कुरा भए पो मिल्नु ।’