तस्बिर : चिरायु शाक्य ।

काठमाडौं – नेपाल प्रिमियर लिग (एपीएल) अन्तर्गत त्रिभुवन विश्वविद्यालय क्रिकेट मैदानमा भइरहेको खेलमा कर्णाली याक्सका ओपनर देव खनालले विराटनगर किङ्ग्सविरुद्ध अर्धशतक बनाएका छन्‌ ।

टस हारेर विराटनगरविरुद्ध ब्याटिङ थालेको कर्णालीका ओपनर खनालले ४० बलमा ५० रन बनाएका हुन्‌ । उनी एनपीएलमा अर्धशतक बनाउने १३औं खेलाडी बनेका छन्‌ ।

खनालले ४८ बलमा कुल ५३ रन बनाउँदै १५.३ ओभरमा कर्णालीको विकेट गुमाए । उनी बसिर अहमदको बलमा आउट भएका हुन्‌ । चार चौका र दुई छक्का प्रहार गरेका खनाल कर्णालीबाट अर्धशतक बनाउने दोस्रा ब्याट्सम्यान हुन्‌ । खनालअघि कर्णालीका शिखर धवनले काठमाडौं गुर्खाजविरुद्धको खेलमा मंसिर १९ गते अर्धशतक बनाएका थिए ।

१८.३ ओभरको खेल सकिँदा विराटनगरविरुद्ध कर्णाली याक्सले पाँच विकेट गुमाएर १२५ रन बनाएको छ ।